中環在線：恒生當選世界最強銀行
滙控輸在無請食蛇羹？
■「大笨象」滙豐太大太難管理，應該要向恒生學習。
財經雜誌《彭博市場》連續第2年將恒生銀行（011）評為世界最強銀行，母公司滙控（005）連影都冇，20大都唔入，需知道今年係滙豐收購恒生50周年，𠵱家倒轉頭，阿仔叻過阿媽，或者滙豐
都要考慮學恒生，每年請大客食蛇羹搞好關係，望日後做多啲生意先得喇。
《彭博》呢個宇宙最強比拼，係根據銀行風險權益資產一級資本比率、不良資產佔比、撥備、存款對資金比、同埋營運效率等5大標準評審，共有114間銀行受評，十大銀行中5間為亞洲銀行，舊年併購永亨嘅新加坡華僑銀行，排名季軍。
恒生中環總行24樓博愛堂廚房主理嘅太史五蛇羮馳名食界，估唔到《彭博》篇評論，都好抵死咁歸納出，此乃滙恒兩母子成敗各異嘅癥結之一：「恒生堅守本土市場、聚焦零售及工商業務、又為尊貴客戶奉上一客補身蛇羹（意即待客之道取勝）……這一切正是滙豐所缺。」
規模太大難管理
《彭博》電視再接力探討，搵埋瑞穗證券亞洲銀行研究部執董安彤善（James Antos），解構滙恒優劣，佢引用《格林童話》嘅「金髮女孩與3隻小熊」故事（Goldilocks），比喻「小即是美、過猶不及」嘅道理，大至不能倒嘅銀行如滙控、摩通，太大太複雜太難管理，Antos認為，過去兩年恒生放售興銀權益，壯大資本，未來仲可能增派股息㖭。
正身在香港嘅滙控行政總裁歐智華睇完呢份排名，應該要諗諗佢，下周一公佈業績時順便回應一下嘞。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
