魚樂無窮：炒上落不二之選
■績優股東瀛遊係唔錯嘅炒上落選擇。 資料圖片
魚缸水份越來越少，成交進一步縮至673億元，本周四個交易日成交額，加埋2,901億元，都未夠大時代高峯嘅單日成交。五行欠水，大部份戰友都鳴金收兵，以免做多錯多。仍然堅持入市的，主要係搵有波幅嘅股仔炒，希望短時間賺幾
格走人，密食當三番，你見百靈達（2326）單日成交5億元，比超人嘅長和（001）交投更勁，就知道呢個題材依然有需求。
開講有話，阻人發達猶如殺人父母，唐牛自己雖然冇興趣玩，亦唔會叫大家收手，家家有求嘛！但要留意，股仔基本因素欠奉，嚴格嚟講係冇位可守，所以一旦波幅加大，少啲定力都會被震走。好似百靈達咁，一度大跌24%，然後尾市奇蹟倒升6%收場，你參與呢個遊戲前，最好先問自己有冇定力同實力。有嘅，固然可以搵到食，冇嘅，一日可以止蝕十次。
穩陣派想玩上落，唐牛建議向有基本因素嘅股埋手，起碼有數得計。一個唔好彩要坐艇，有業績支持、有高息墊底，要翻身話都冇咁易。再講，有質素嘅股份，股價走勢一定係拾級而上，贏錢機會又大咗。之前推介過嘅高息股德永佳（321）及績優股東瀛遊（6882），都係唔錯嘅炒上落選擇，即日未必有食糊機會，但入場時總比細價股多一份安心吧。
唐牛
https://www.facebook.com/tongcow88
唐牛
魚樂無窮 - 唐牛 舊文
