殼股難炒悲歌
渾水玩Pokémon GO升到Level20
殼股淡靜，冇啖好食，情傾細價股嘅90後財經傳媒人「渾水」，由日日炒殼股，變日日鍛鍊去取勝，每天扮小智去捉精靈。
Pokémon GO星期一先著陸香港，但「渾水」已經玩到Level20！本報就約咗佢喺中環一齊捉精靈，一見到佢就見到
頭又冇Gel、鬚又冇剃、著住件Tee揹背囊，憑佢呢身嘅造形遊走中環，相信冇人會估到佢點計都係一個獨立股評人兼上市公司執董，「冇呀，前晚零晨2點半喺維園玩完呢，3點半喺跑馬地行來行去，玩到4點，有啲睡眠不足，噚晚又5點鐘先瞓。」
講到點解佢咁快「升呢」，除咗勤力外，秘訣有二，首先係做「課金戰士」、第二就係做「電車男」。佢話已使咗100蚊美金，之後就滔滔不絕話值，「一開波你要買Lucky Egg，坐幾轉電車。電車秘技好簡單，因為佢慢，又多精靈，喺上環開Lucky Egg同香水，坐到去筲箕灣，你都會捉到好多同升好多呢。同埋你開Lucky Egg係Double經驗值。」
講到中環邊到係訓練員樂土，「渾水」首推中環中心！原因有三，首先，中環人有錢，個個喺Pokéstop放櫻花；第二，相連有五個櫻花熱點，如果自己用埋香水，就事半功倍；同埋附近有雪糕店、便利店，大堂仲可以涼冷氣；最好係只需行1分鐘路程，就到新紀元廣場Gym，玩到咁上下，仲可以去踢館，可以話係一應俱全。
摸魚手札 - 渾水 舊文
來源 source: http://hk.apple.nextmedia.com
