【不問價追】 Shopping list（小炒王梁心欣）（第89期）
2016-9-11 18:00:34
九月份真係一個好開始，原本坐艇的股份全部開turbo，由蝕變賺嘅感覺相當良好。不過，你話係咪賺好多？咁又未必。因為我買嘅唔係騰訊（00700.HK）、匯豐控股（00005
.HK），可能我太貪心啦，近期凱升（00102.HK）、慧聰網（02280.HK）其實都大賺了，只不過隔離飯香，投資者偏偏總係喜歡羨慕其他人。上一篇我提到九月份會開大， 即係睇好後市，咁係咪正如我早前所講（ 六月份）今年見24000點？照現時嘅形勢，有機會上調目標，因為眼見散戶仲未全面有貨，大市應該仲有得去。
單睇散戶動向太唔準確，最緊要睇大媽方向。11月中下旬殺到嚟嘅深港通，除咗要識睇大媽大叔買什麼大股，仲要知道有乜嘢50億市值樓下嘅股份值得注意。呢排我淨係持有呢一張購物清單已經夠玩。張清單來自「格隆匯」，係，就係滬港通出曬名嘅格隆匯，過去兩年我都密切睇實佢哋嘅分析，睇嚇有冇炒作。結果清單一出（如圖），好多都升咗上來，絕對絕對有參考作用。例如：我曾經推介過嘅凱升（00102.HK）都在名單之列，IGG （00799.HK）更加由低位升咗三、四成，似乎炒呢一張名單更加實在。
唔難發現好多醫藥股都在名單之中，好似東瑞製藥（02348.HK）、微創醫療（00853.HK）、李氏大藥廠（00950.HK）、康臣藥業（01681.HK）近來都接力跑出，如果本錢唔夠多，每隻買些少，等佢爆升，咁你就真係坐享其成。因為根本你唔會睇基本因素，純粹跟大媽炒， 感覺上係考你觀察力。咁你會問，咁多隻點炒啊？用排除法的話，小炒王唔會揀國際資源（01051.HK）、五洲國際（01369.HK）、茂業國際（00848.HK），因為感覺上成交不足。原本叫自己唔好睇美亞娛樂資訊（00391.HK），因為我根本唔識， 點知我由八月尾開始做紀錄，發現佢升咗三成，我就開始發現用錢推動嘅嘢，可能要盲目跟一轉。好可憐吧！ 竟然分析幫唔到自己，要反跟購物清單，不過亂世買嘢，最緊要記得定止蝕，輸15%就當交學費。大家照單執藥，畀心機做足功課！
不問價追 - 小炒王梁心欣 舊文
來源 source: http://www.winmoney.hk
