中環在線 - 李華華 2016年9月3日
中環在線：
港交所證監會 鴻門宴共同進退
■李小加
中環人除咗關心星期日立法會選舉之外，仲有好多人為咗上市架構諮詢奔走努力。例如上市公司商會下周三（7日）舉辦英雄大會，邀請證監會、港交所（388）代表出席。上市公司商會明刀明槍反對改革，一聽就知道呢場係鴻門宴啦。
李小加：盡量出席同業界溝通
噚日港交所行政總裁李小加承認收到邀請，仲話以佢性格，原本會盡量出席同業界溝通，但𠵱家討論已經好高溫，唔sure出席係咪會令資訊交流得更好，所以只係覆咗大會可能出席，時間亦未確實安排，不過為免令市場誤會，佢會同證監會商量，「去就一起去」。
論壇除咗有上市委員會前主席李嘉士之外，仲有摩根大通董事總經理兼香港環球投資銀行部主管劉伯偉出席。唔通小加有啲情深說話唔方便講，想透過舊東家把口講？
佢出席證券及投資學會（HKSI）午餐會嘅時候，仲反擊批評港交所既是上市公司，又同時處理審批新股有角色衝突嘅說法，指咁樣講法係「不接地氣」，事關港交所收入中，上市費只佔少數（2015年只佔收入約5%），唔可能為咗賺嗰少少上市費而犧牲市場質素，就好似煲魚湯就一定要買靚魚、貴魚，冇可能因為慳錢打斧頭，就買條臭魚，整衰煲湯咁笨。
佢最後仲提啲反對派，唔好淨係識得對傳媒呻，記得要正式遞交回應，港交所唔會剪報紙睇正反意見咁話。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
