【實力取勝】睇地圖搵好股（陳承龍）（第109期）
2017-1-29 12:00:25
有陣時炒股票都真是要講運仔，不怕話給大家聽，去年小弟也不是贏到很多錢，甚至乎和和果果。除了個市本身難玩外，運仔也是很重要，畢竟炒股票也是偏財，所以不能不信邪，如果上次有睇我Facebook直
播的朋友也知道，我買了一隻股票不夠5分鐘，股價即插水3成，你話係咪邪？我估計最大的原因是我去年犯太歲有關，而過去我逢親犯太歲也有攝太歲，偏偏去年太忙就沒有攝，所以乃曬嘢。不過，唔使怕，好快立春啦！雞年應該會好一點吧。
我不是鼓勵大家去迷信，我只係想指出，每個人都會有不同的遭遇，即使我派同一隻冧把，有人可以贏大錢，但也有人會輸錢。主要是性格問題，而性格影響了決定，而這個決定足以影響了個結果。就以近期力推的滙控（00005.HK）為例，如果一早聽我在53元水平買入的朋友，現在可以印印腳，但早段不信，要是股價爆了上來後，才先肯大手高追，之後又要捱價。人，就是咁犯賤。呢個例子簡單說明，同一隻冧把，大如滙控呢類大藍籌，也會出現呢啲情況，所以當你發覺你嗰期手風唔順嘅話，勸你都係停一停手，或者大大聲細細注算吧。更重要一點，股票永遠有人一齊贏，一定是有人輸，先至會有人贏的。
去年我的重中之重是滙控（00005.HK），今年依然是以呢隻股做膽，不過同時加多兩隻腳，分別是銀河娛樂（00027.HK）和新濠國際（00200.HK），當中會較睇好隻新濠。因為睇好新濠喺塞蒲路斯嗰15年獨家經營權。要知道塞蒲路斯是一個島國，但地理優越，從地圖上看，其上面是土耳其，而右面是一堆中東國家。這些中東國家將會新濠的大客仔，因為這些中東國家實在太多有錢人，有賣石油的，又有賣軍火的，多錢到都唔知點使，更重要是宗教原因，中東人不得飲花酒，即使可以有好多個老婆也會很悶，所以賭錢會是最大娛樂，而事實上，法國南部蒙地卡羅，和英國倫敦，也有賭場，而賭客之中不乏中東人仕，而現在開了一間咁近他們的賭場，係咪方便好多?
還有一點值得一提，一個月前何猷龍作為大股東的200號用了12億美元從 澳洲的Crown 手上買了13.4%在美國上市的Melco Crown，變成了揸住51%Melco Crown 的大股東。Melco Crown是揸住所有集團在澳門和菲律賓擁有的賭場，這個信息是說何䣭龍看好這次賭業復穌，而且利用自己揸大份的Holding company投放了12億美元(93億港元)去增持澳門的賭業，一定唔衰得。他買Melco Crown 的作價是US$6一股，現價是US$5.30,下跌原因是Melco Crown 之後又批了一些股給基金，所以價下跌。新濠早前跌價因為市場認為它US$6買了貴嘢，所以有一些人沽貨但是亦見有人頻頻接貨，所以近期成交大。
結論是：澳門地頭蟲買，澳洲佬沽，誰會是贏家？
你自己諗下……
實力取勝 - 陳承龍 舊文
來源 source: http://www.winmoney.hk
