正邪莫辨之疑似搶殼事件
正邪莫辨之疑似搶殼事件
圖為艾碩第三季業績報告。
「圍飛」原意為尋覓友好支持IPO，協助上市公司順利招股，以免出現認購不足，到今時今日淪為方便貨源歸邊易於操控股價的板斧，早已好事變壞事，惟更意想不到的，最壞情況是，擔心市場遲早出現一些為求上市盲目拉雜成軍的團隊，
於上市後因財失義反轉豬肚事件。
最近有一家創業板股份艾碩(8341)，主席即第一大股東或遭第二大股東與幾位連成一線的專業投資者股東意圖召開特別股東大會(EGM)罷免主席及現有董事會的逼宮事件愈演愈烈，持股38.25%的主席雖多於第二大股東的36.75%，惟如第二大股東與表面上並非一致行動的維權持份者於下周一EGM上聯手投票迫走主席的話，主席的上市好夢隨時將落得一場空，況且對方僱用了素有股壇壞孩子之稱的高手出招，擺明志在必得，主席可謂未反擊已輸了一半。
光棍佬教仔，便宜莫貪，在市場打拼日子不短，見得太多市場中人不得善終，明白君子愛財，取之有道，因唔係你財，唔入你袋，畢竟大家只係過客，可惜人心不足蛇吞象，又有幾多人嫌錢多，魚缸險惡，有冇咁大隻蛤乸隨街跳，抬錢送你一程上市之路，奉勸如筆者般笨的千萬不要學人圍飛作歹，不然，笨人做賊，最終只會淪為笨賊。今趟疑似引狼入室事件，唯一解決辦法係冀證監會插手及向法院申請叫停EGM，但當有人明顯被疑似敵人食住上都唔敢做太多動作之際，背後還有甚麼不為人知的秘密，只怪小妹才疏學淺，只屬剝花生路人甲一名，更難判官上身為正邪定分界，唯有以八卦心態看待這一宗疑似「搶殼」事件。
雖說水清無魚，惟賴以保護投資市場公平的證監會只顧捉大老虎，可惜，老虎乃稀有動物，幾年唔見捉到幾隻，烏蠅、小強、蚊滋卻漫天飛舞，自吹自擂財技專家高手布滿前台發功，說穿了背後離不開朋比為奸同流合汙收柯打為金主散貨，面對場內衛生日差，香港這個號稱自由市場竟能忍得住烏煙瘴氣，若非最近連內地證監會主席劉士余忍無可忍發聲正視一批港產「老千股」，平時隻眼開隻眼閉的香港證監亦不會出來就問題發聲講多兩嘴。
過去數月，證監非完全闊佬懶理，只是自諮詢文件引來業界既得利益集團高調反彈後，連港交所(388)趁換屆側側膊。證監面對「圍飛」肆無忌憚，只求其出招扮嚴打，創業板IPO須增公開發售部分及現金流要求由2千萬元提升至3千萬元，但監管機構太睇小市場中人，「埃賓架」個個叻仔，你有政策，佢哋也有對策，公開招股難杜絕疑似「圍飛」作歹，鎖定禁售期3至5年亦未必能改變疑似「啤殼」現象。
談財經 - 胡孟青 舊文
來源 source: http://www.am730.com.hk
