買貨過年膽博膽
2018年02月15日
恒基(012) 李四叔一擲百幾億買入啟德兩塊地豪舉，在市場餘音未散。有中環茶友笑言，四叔喺呢個時候出招，等如提出對拋咗好多橋出嚟搵地的覓地小組投不信任票，因為如果小組可以搵到好多地，咁四叔又點使咁急入貨先？
機樓起樓恐未成事
茶友仲話
，香港點樣搵地，方法路人皆見，最簡單有效又搵到大塊地，當然係填海啦，其他方案根本係小修小補，連高爾夫球場鋸塊細地出來起四千個單位，都要當一個主要選項，唔怪得有人笑佢哋應該叫做「無法覓地小組」至啱。
無法覓地小組捐窿捐罅提啲方案出來，早幾日就連同電話機樓同電站都研究一番。茶友話，電話機樓可以起樓係人都知，問題係點搞得掂補地價啫。呢啲本來係常規嘢，搵地數量又唔多，咁都傾一餐，咁搞法真係同擠牙膏差唔多。
唔知係咪知道有本地電話機樓發展上蓋主張提出，擁有機樓上蓋發展權的盈大地產(432) 早排就擺脫長期悶局，一度飆上4元，後來因為大市回調，佢先急插落嚟。茶友之前都研究過機樓起樓，盈大本身係電盈(008) 拆出來的地產部門，當年已經將上蓋發展權注入公司。若論上蓋發展潛力，其實最大係港島商業區位置。現時港島商業地異常稀缺，新增供應基本上只有中環海濱填海區，若然可以起樓，解決商廈供應不足，都算係一家便宜兩家着。關鍵係補地價點計呢？若然用足市價做基準，咁盈大有乜誘因呢？若然唔收足市價，政府恐怕又唔肯，變成重建一直只聞樓梯響，不見有人來。無法覓地小組的建議，根本無解決到呢個難題，咁咪變咗紙上談兵，翻炒舊構思囉。
講番有機樓發展權的盈大，市值O依家只有12億元，資產折讓估計有七成半，主要係公司賣完貝沙灣後，無乜買樓收入。目前主要項目喺海外，香港項目主要係位於中環己連拿利3至6號重新發展。如果上蓋起到樓，咁佢梗係大超值，最怕就係提案得個講字，十年都未有眉目喎。
財團大手買地，反映佢哋對樓市同經濟信心都幾強。咁啱美國新上場的聯儲局主席鮑威爾開腔，話會關注股市或其他影響經濟資產表現，雖然外界估計三月加息機會仍高，但他的言論仍視為對股市派定心丸。
內地方面，公佈出來的新增貸款大增，市場情緒稍為紓緩，好友乘機夾倉。在銀行股帶領之下，恒指暴漲676點，收復上周五大跌市失地，兩個交易日合計累升超過一千點。今日港股半日市，夾淡倉者有可能平倉食胡，如果入貨就要學內地股民講法係買貨過年，博佢過咗年關水時期再炒過，咁做有一定風險，屬於膽博膽的炒作方式。今年年初一係星期五，所以假期唔係咁長，股民當然希望狗年可以開紅盤賀年啦。
恒指一舉升穿三萬大關，最多曾升798點，收市報30515點，升676點。國企指數收報12260點，升256點。大市成交縮減，全日交投1106億元。銀行股表現出色，一向走勢穩陣的恒生銀行(011) ，在大行唱好之下，大升7.8%，收報191.5元；滙控升2.6%，收報81.9元；單係滙控同恒生就推高恒指近113點。
偷步大炒恒生放榜
恒生變小飛象，主要係高盛將恒生的投資評級，由「中性」調升至「買入」，目標價由190元升至220元。報告仲認為，恒生有空間提高派息，而美國加息也會令恒生淨息差擴闊，所以趁佢哋於下周二(20日)雞年復市後公佈全年業績偷步炒作。同樣內銀股都造好，建行(939) 收升4.5%，報8.1元；工行(1398) 收升3.5%，報6.78元；中行(3988) 升2.6%，收報4.35元，三行合計推高恒指201點。
陸羽仁
金融High Tea 舊文
來源 source: http://hdfin.stheadline.com
