摸魚手劄：創科派糖？搞掂戶口問題先講
■陳茂波的財政預算案聲稱用了理財新哲學，財政收入估算卻誤差九成。資料圖片
財政預算案開了一個大餅，就是500億的創科投資。500億去創科，出發點係好，不過坦白講，第一眼見到500億中有200億是落馬州項目，潛意識還是會憂心重蹈科技園、數碼港、西九文
創等地產項目發展的覆轍。不敢太早以誅心論定斷，唯有用時間去驗證。
初創行政麻煩多多
個人也有投資少量初創的經驗，如果要在內地發展北望神州，通常會以深圳的南山科技園作基地，很多有同樣視野目標的香港創業家，都係咁做，貪其租平及鄰近香港深圳灣等。調番轉，內地初創企業想攻香港搞分公司，都有類同想法，在港成立分公司是幌子，應酬大客、投資者而已；大量後勤、科技工序還是落腳南山，又係租平、近、人工平等原因。
如果深圳又有科技園，落馬洲又有科技中心，功能上會否重疊，又或者跟深圳的科技園等形成競爭關係，就交由創科業界跟一班深諳國情的人去處理了。
政府想在初創派糖，首先要明白初創面對甚麼問題。香港搞初創，實業以外最大麻煩就是行政了。其實商界唔需要政府扶持一個產業，學馬雲寸林鄭咁：「等得政府，機會都流失了」，政府可以做的東西係降低營商麻煩，例如最最最最簡單的方法，就係解決銀行開戶問題。客觀講，這一年公司銀行開戶是相對三年前容易了一點，但還是十幾廿樣麻煩要跟進。
銀行戶口開唔到，又或要勁麻煩先開到，絕對不是國際金融中心樂見的事。𠵱家唔係創業家唔想接你筆錢，而係當戶口都開唔到，點接先？講咁耐，我都仲未講尋租（rent seeking）問題呢。同類型的創投資助，亦是麻煩到暈。
首先唔知有乜資助計劃推出，其次就係申請要十幾廿樣行政工夫，但先得雞碎咁多。就連常在媒體發言、評論政府初創的創業家及選委李勁華，也在社交媒體大嘆，都唔知有乜fund可以申請。
我比較反感是陳茂波搬甚麼「理財新哲學」出來唬弄群眾，甚麼時候哲學變得那麼廉價了，又被亂扣帽子了？當政府連自己的財政收入估算都可以誤差九成，估少成千億，你如何期待市民相信錢在政府手可以有甚麼長遠發展？你連自己預算幾多錢都未知啊！雖然印花稅等非經常性收入有周期性，但點都唔會差咁多吧？你們政府內部的估算模型是不是出了甚麼問題？既然錢在一個連自己有幾多錢都預計唔到的機構手上，不如咪搞咁多嘢，直接派錢好過啦。
渾水
專業投資者、上市公司執行董事、90後
http://fb.com/muddydirtywater
渾水
摸魚手札 - 渾水 舊文
來源 source: http://hk.finance.appledaily.com
