摸魚手劄：停牌18月就除牌逼人太甚？
■港交所公佈，主板公司持續停牌18個月後會將股份除牌。資料圖片
港交所公佈新修訂，主板公司持續停牌18個月後會將股份除牌。同時，上市公司如未能在通知所指定的時間內復牌，便會被除牌。除牌將毋須再經過目前的3個階段，創業板公司則在停牌12個月後除牌。
字數有限，不能講太多新修訂的具體條文，只能探討一些原則性方向。
投資者很大機會total loss
做死殼重組或搶殼的圈子不大，所以新規定涉及的既得利益者或持份者勢力無想像中大。我的專業不在此，只是很皮毛地處理過兩單個案。新修訂令人比較擔心的是死殼生意會萎縮、更難做。如果死殼更難復活，投資者很大機會total loss。簡單問過一位專做死殼的行家意見，他有另類體會，大致上可以理解為「18個月搞唔掂的話，比多24個月都唔會搞得掂啦」。
該名專做死殼的行家也認為，由於死殼壽命縮短，所以肯比錢搞的人會更認真看待，同埋避開了「無咁多頭髮又要學人gel頭」的不自量力之徒，令重組更efficient。
正如我所講，做死殼重組的圈子不大，競爭不強，市場接近寡頭壟斷。如果規則更嚴謹，只會令寡頭壟斷的情況更嚴重，強者會越強，弱者則等被淘汰。朋友是強者，自己樂見收緊規則把次級的同行競爭對手淘汰掉，然後自己搶更大市場份額。
死殼之所以會停牌，各有前因，可以是法規問題，被證監停牌。要不，就是不能準時出財務報表，也可能是因為資不抵債、不足夠業務營運等。資不抵債的麻煩在於要跟債權人談判，例如削債、新債冚舊債、以股代債、賣殼還債等，每個方案各有利弊，18個月的談判期是太短了。因為資方債方要互相摸底，摸底要花時間，當中可能又涉及不文明的處理方法，要找黑道幫手等。有時談判會出現彈弓手，明明傾好了但又臨時不認數等扭屎忽花情節，彈出彈入吹佢唔脹。
不足夠業務營運的解決方法，當然是直接買一個新業務。不過，一個可以幫公司復到牌的業務，本身質素不會距離上市要求太遠。項目老闆識計數，他會考慮自己捱多陣博直接上市好，還是賣給白武士等復牌著數一點。
換言之，又要傾、又要摸底，又要哄老闆動之以誠，18個月未必搞得掂。
死殼一旦除牌，投資者會全盤玩完，不單止上錯車的散戶，就算睇啱邊的沽空機構都可以輸錢。即使沽空機構睇啱邊，弄到公司價值下降，但只要公司仍在停牌，它就無法平倉還要輸利息成本。所以，很難得地睇新聞見到資深金融商人詹培忠跟David Webb出現意見一致的情況。
渾水
專業投資者、上市公司執行董事、90後
http://fb.com/muddydirtywater
渾水
摸魚手札 - 渾水 舊文
來源 source: http://hk.finance.appledaily.com
