短炒舊經濟股
2018年05月01日
四月份最後一個交易日，港股大升超過500點，初步睇大市無乜特別上升理由，唔排除係期指結算後，大戶沽盤收斂，少咗壓力，加埋大股集資告一段落，部份資金回流炒番個市高啲。
期指結算後偷步炒五一
恒指喺四月份上上落落，最後進帳715點，但最主要係指
數昨日收升573點，報30808點，如果大市昨日下跌，咁埋單條數就會唔同晒。國企指數收報12331點，升264點，成交936億元。喺期指結算前，大市一直都受壓，結算過後即彈，可以解釋係之前有大戶造淡，結算過後無咗大淡友沽低個市，少咗呢個壓力，咁有啲買盤趁「五一」黃金周入吓市，雖然買意唔強，都足以令指數大力彈高。
市場偷步炒吓小黃金周，造得比較好都係傳統股份。本地金融股走強，中銀香港(2388) 首季提取減值準備前經營溢利103.96億元，按年升21.3%，績後獲大行唱好，全日收漲4.6%，報40.85元，是表現最好藍籌股。
中國建材又可以等食胡
另一本地大行恒生(011) 曾漲3.07%，見201.6元創新高，收報199.6元，升2%。本地銀行股焦點集中炒大股，二、三線相對落後，但都可以跟上大市，好似隻大新銀行(2356) ，收報18.7元，升1.7%，仲未創新高。佢市盈率12倍，息率有2.25厘，佢資本比率唔錯，數字上算吸引。O依家做銀行要好多投資，單係科技條數都好襟計，正因為咁資金流向就先揀大銀行入手，因為佢效益真係高好多。睇番大新銀行去年全年業績，股東應佔溢利21.86億元，按年增長1.9%，都反映咗呢個趨勢，所以買二、三線銀行係博市況熱啲，市場炒吓收購消息，咁先至係真正食胡時。
另一類當炒舊經濟股係水泥股，海螺水泥(914) 之前公佈，首季股東應佔利潤47.78億元人民幣，按年升122%；基本每股收益0.9016元，掀起呢類股份追捧潮。跟住中國建材(3323) 公佈，按中國會計準則，第一季盈利9.08億元人民幣，按年增長3.8倍，期內營業總收入260億元，按年上升25%，佢股份昨日彈高4.6%，收報9.28元。
陸羽仁之前介紹呢隻股，話佢最啱炒上落，跌到9元以下可吼，上周大市氣氛差，佢股價插咗落嚟，若然低位入貨，O依家又有機會可以食胡。現時大市氣氛飄忽，主要係中美貿易戰前景難測，買內地內需股相對風險會細啲，水泥、建材受惠中央供給側改革，應該仲有一兩年好景日子。呢類股票估值唔高，概念唔算好性感，但因為跌極有個譜，喺上落市用嚟搭吓短程車就有得諗啦。
陸羽仁
金融High Tea 舊文
來源 source: http://hdfin.stheadline.com
