智取大市：狙擊舜宇的時機
■舜宇被狙擊，股價昨日跌近7%。互聯網圖片
輪到舜宇（2382）都俾人狙擊，出手嘅係GMT Research。同6月時突襲波鞋股情況相若，主要只係睇財務報表覺得唔妥之處，唔係同你講證據，同以前渾水拎曬證據做曬實地考察先嚟狙擊，手法好唔同。可以話，GMT Re
search嘅分析流得多，但重點已不是佢講嘅嘢有幾流，更重要係市場點樣配合。
GMT主理人係野村前分析員，記得舜宇6月都大跌過一鑊嗎？野村上個月發過報告擔心舜宇手機鏡頭模組毛利率受壓，股價喺6月21日跌近9%。
被狙擊對象，一定諗過度過，點解係舜宇？點解偏偏而家先出手？做佢世界嗰個一定有考慮勝率。近兩個月GMT三度出手砌港股，先係安踏（2020），再有光大國際（257），然後到舜宇，不在乎分析有幾堅，只在乎增長股高估值之下，只要令投資者信心稍為動搖少少，股價已經會隨消息而跌。
出手時，安踏同舜宇一樣，RSI都呈現頂背馳，GMT明顯博長線見頂，加強唱淡勝率。睇返安踏個Case，及後只係隨市況走弱，股價浮浮沉沉，報告只影響到安踏股價一兩日，與其話分析有威力，不如話GMT睇圖揀對時機。
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.finance.appledaily.com
