【魚樂無窮】港鐵盈警一句重要說話（唐牛）
港鐵（066）破天荒發盈警，主要由於為沙中線等項目作出撥備共24.3億元，金額相當於去年中期及全年盈利的52%及22%，假設撥備屬一次性，不下為例的話，齋看數字中期盈利難免倒退，但如果睇全年，相關金額影響性相對偏低。
又以同屬藍籌的中電（002
）做例子，6月同樣歷史性發盈警，要為澳洲零售業務進行商譽減值，金額達60億至70億元，預計將拖累業績盈轉虧，不過股價翌日低見85.3元後已見底，可見公用股吸金威力之勁。
講咗好多次，中電買唔買，其實好視乎派息政策會否改變，因為近年每年增加季息及末期息分派，令股價節節上升，所以唔少人問我中電撈唔撈得過，我的答案都係一致︰穩陣計睇下嚟緊派息金額有冇變化先。至於港鐵，盈警通告提到，支付紅磡事件相關費用將會減少集團的現金流量，但「董事局擬維持現時漸進式的普通股息政策」，相信對股價起了重要支持作用。一句到尾，港鐵坐擁生金蛋的地產及鐵路項目，趁壞消息候低吸納，勝過胡亂清倉及造淡。
至於點解港鐵咁重視派息，大家又諗唔諗到呢？想知答案嘅話，PM我話過你知！
唐牛fb專頁
http://www.fb.com/tongcow88
魚樂無窮 - 唐牛 舊文
來源 source: http://hk.finance.yahoo.com
