【智取大市】惜食造就高通脹概念（晉佳）
晉佳估計，受洪災影響農牧產品供應的中國，通脹壓力較美國高得多。
全民「惜食」運動推升到國家立法層面，對於中國嚟講，的確相當新穎。有人解釋係因為長遠糧食供應問題，亦有人話係中國耕地大幅減少，長遠更難自給自足，其實亦有另一個可能性，就係通脹。
回顧09
年美國QE1時，中國喺當年8月話要進行一輪宏觀調控，令到A股大幅調整。美國印多咗銀紙兼零息，有可能推高環球通脹，以過往經驗，中國往往係較容易吸收輸入通脹嘅經濟體系。
美國印銀紙，令M2出現戰後最強勁嘅貨幣供應增幅，喺股市方面已見威力，但M2連續3周出現回落，可見身處疫情期間、失業率仍高嘅美國，印鈔都要忍一忍手。既然股市已急升，未來面對通脹威脅嘅機會相信比通縮為高。面對疫情陰霾已成過去、兼有洪災影響農牧產品供應嘅中國，通脹壓力睇嚟比美國相對高得多，「惜食」運動似乎同通脹有一定關係。換言之，大家要考慮上述因素影響中國貨幣政策走向之餘，估計「惜食」運動難以阻止食品價上漲。中糧肉食（1610）、日清食品（1475）呢類通脹受惠股，稍後有機會跑贏大市。
喺資金非常氾濫嘅年代，由不受歡迎變成受歡迎板塊，資金蜂擁程度會將股價反應誇大，例如一眾美國雲端股份咁，明知收入受惠疫情可能只持續幾個季度，都可以令股價上升2倍甚至更多，估計未來一至兩年，資金流向相對估值重要得多，當時得令嘅板塊通常會升到計唔到數，值得留意。
晉佳
-----------------------------
【全球樓行】 Dream House零距離
屬於香港人的移民攻略
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：
iOS / Android
智取大市 - 晉佳 舊文
來源 source: http://hk.appledaily.com
