智取大市 - 晉佳 2020年8月5日
【智取大市】愛國的話請撈滙控 - 晉佳
滙控未來有靠中翻生嘅可能性，如果你愛國，就買定啦！
彭博話滙控（005）目標未來四年喺中國請2,000至3,000名財富管理職員。正當滙控要全球裁3.5萬人之際，佢選擇大陸加人。不過，呢份心意最多只算一封利是仔，呢種唔湯唔水嘅模式，絕對冇可能討得中共嘅歡心。
以滙豐嘅size同業務複雜程度，加上總部喺倫敦，同埋要確保未來使用美元暢通無阻，要完全歸順中國都係相當困難，偏偏佢嘅盈利主要倚賴中方產業鏈。而睇佢份中期業績，政治問題避談，亦顯示出佢喺政治立場上嗰種模稜兩可。佢最大嘅問題係乜？就係一級資本充足率15%，太過穩健。咁穩健嘅話，死又死唔去，自然施展拖字訣，佢嘅主席同CEO都係英國人，又唔係主要股東，打份工同你歸順中國「名流青史」？睬你都有味！
對於中國而言，假如滙豐形式上變成一間專服侍中國嘅銀行，相信比起任何一間內銀，都會係最企理、最有信譽嘅一間大銀行（當然海外會對滙豐信譽打個折扣），佢喺中國必然有生存空間，中國亦十分樂意收呢條契弟，否則早排鬧你都嘥氣。滙控要更接近絕處，政治立場先會更決絕，要中方出手打救，換埋管理層，一切就會明朗化。
滙控呢個價輸硬？至少比起小弟2月唱淡時已低四成，但未來有靠中翻生嘅可能性，如果你愛國，就買定滙控啦！
晉佳
http://fb.com/advanceguy1
智取大市 - 晉佳 舊文
來源 source: http://s.nextmedia.com
