日本樓換英國樓有冇著數？
近日看到幾個比較奇怪的外地樓廣告，是幫你賣出日本樓，以及日本樓換英國樓。唔買入又何來賣出？早幾年有位教主級KOL極為睇好日本樓，在某電視台訪問中說日本樓會升30年，同場的我當其時也有投資日本房產，只敢說市中心區域會有升勢，因安倍經濟學帶動日元貶值，且成效立竿見
影，相信會帶領日本走出「迷失20年」的困境，出現一點點希望。但為何只升中心位置？日本地大人稀，人口老化嚴重，亦不是移民國家，冇人，樓誰來住？所以只會集中升最優質的地段，結果被小弟不幸言中，中央區港區千代田區等近五年平均升幅多於外圍一至三倍，投資幾年仍低於買入價的case多不勝數，坐艇者眾，買二、三線城市更多是租唔出賣唔去，但某些公司卻看到商機。
加上英國樓大熱，外地樓仲介公司可能是除HKTV以外，疫情下少數能「爆數」的行業。銷售是仲介的職責，投資者應該對自己負責，但香港流行低民智的二分法，例如講本土，就是黃絲港獨，支持政府某政策就是藍絲，就如我上期寫我有投資日本，就係唱好，今期寫日本樓多人輸錢，就係彈弓手。又例如買股票有人賺錢，但蝕錢的人更多，是否代表所有股市都是呃人或者冇呃人？若抱持這種眼光心態看待事情，不懂得獨立思考，結果只會人雲亦雲一同中招或錯失良機。現階段出售日本樓，疫情加奧運前景未明加安倍辭職，市場氣氛的確麻麻，要有被壓價的心理準備，想轉碼去英國，要有平賣貴買的準備。不過唔緊要，可能五年後又會有廣告幫你賣英國樓了。
HEA富專欄 - 郭釗 舊文
來源 source: http://www.am730.com.hk
