收市閒情｜2020年十大震撼人物（千頌C）
年度震撼Cap圖。
星期二寫完篇《2020年那些嚇死人的「震撼彈」》，大家似乎覺得唔夠喉，今年最後一day，兌現承諾，特別寫多篇《2020年十大震撼人物》。一如以往，呢個結果係由一人一票選出，「一人」，即係我；「一票」，得我有票。非民主方
式選舉，今日先叫政治正確。
黃永年呢個名你未必記得，但時代中國（1233）CFO你就應該有印象。今年7月的士上「車震」兼打冷震，結果一震成名。不過纏綿遊戲過後，搞到連CFO呢個銜頭都冇埋，時代中國一星期後公佈退任CFO職位，通告罕有地連死因都冇講。
神奇嘅係，條片7月8日見街，當日時代中國股價，由全年高位大幅回落，之後展開尋低之旅，至今日收市埋單跌三成。事件為繼「安心偷食」後，再一次提醒全香港所有男女：千萬唔好喺公共交通公具度曳曳！
袁國勇教授今年勞心勞大帶大家抗疫，但佢今年最令人震撼之處，就係佢完美表演科學家在政治上，都可以好know play！「中國人陋習劣根是病毒之源！」Sorry，我收返。「港官輕視疫情，唔見棺材唔流眼淚！」Sorry，用詞太激烈，再收返。彈出又彈入，彈入又彈出，同林鄭成班人影相，又彈返出啲，保持社交拒離，袁教授今年表現出嘅智慧，精采！
我諗全香港所有人喺侵侵4年前上任時，點都冇諗過會咁多人支持佢繼任。侵侵今年做硬漢，一面話同習係friend，一面用唔同方法打擊中國，封殺企業如TikTok、華為、中芯；制裁中港官員，仲搞到林鄭出糧要收Cash；令企業撤出香港，搞到滙豐兩面不是人，令「攬炒」步步實現。一個特朗普，提醒香港人唔好睇少自己嘅國際地位；同時，又話我哋知，美國左媒、左膠科技企業，打壓非我族類的手法，是如何核突。
今年第7位人選，沒有之一，一定係湯文亮！2018年寫專欄，懶叻教人賣樓買滙豐收息，結果今年就唔派息，畀人舊事重提就話「虛構故事」，假博士講假故事，符合人物性格。到美國公佈制裁港官，又俾人捉到佢3月時講過，「如果美國在半年內實施人權法，我將個file吞落肚」，作為假博士，佢當然冇食file之餘，仲要話「我冇輸」。震撼個位係，天啊！點解有人可以賴皮成咁。
冇錯，今年陳同佳係冇做過任何嘢，但佢最震撼個位，就係竟然冇做過任何嘢！上年10月出獄後，就話心情唔好唔去台灣住，今年2月又話要等疫情過。殺人犯在港做逃犯，仲有警方保護，好食好住；但其他因為運動，坐監嘅坐監，流亡嘅流亡。肥佬黎總做文人生意，未定罪已經鐵鏈纏腰，陳同佳呢？仲可以香港逍遙快活，何止令人震撼，係令人震怒。
200警抄家式搜查壹傳媒、以國安法之名被捕、未審先坐、再以鐵鏈纏腰，種種畫面都係史無前例。到今日，12月31日，黎智英再度還柙，庭上控方提到《港區國安法》條文中沒有「無罪假定」。震撼程度，我唔識講，但我知你會感受到。
馬雲由中國科技領航員，到今日被中國「開戰」，利用輿論令他成為「吸血鬼」，螞蟻金服自己中伏，上市觸礁；商業帝國恐被拆骨兼國有化。馬雲今年嘅遭遇，可以話係震撼全球。原來一個民企，最終會因為「太大」而被打壓。於中國式的經濟，壟斷可以，除非你係國企。馬雲傳奇，2020會係一個轉捩點，佢最終到底可以安然度過，定係會有更加令人震撼嘅下場，或者2021年會有啲啟示。事實上，馬雲早於2018年講過，「如果因支付寶要坐牢，那就讓我去。」
唔使解釋太多，撐邊隻燈邊隻，燈力無遠弗界，話買美股，嗰日美股就會跌；一句買唔買三星原油ETF（3175），油價燈到變負數，成為世界油價真正Big Boss；話要all-in賺錢抽螞蟻，結果螞蟻連牌都掛唔到；年尾再嚟多個Combo，一句「2021年嘅重點推介ATM」，結果成為阿里嘅最後祝福，阿里因反壟斷法受查。今年表現，準過股神畢菲特，真正有麵咪媽冇窮人！更勁嘅係，我從來未見過，有連登網民會因為一個巴打生日，而夾錢登報祝佢生日快樂，可想而知，麵咪媽受歡迎程度已達「震撼」級別！最後都要講，麵麵，身體健康！
渾水今年，可以話係神一樣嘅男人。一個動作，就令唔少網民響應跟進，一齊買入一隻股票。連鎖反應下，令大家知道原來警方「你真係唔識㗎喎！」股票基本操作唔識不在話下，更加分唔到「沽空」同「沽貨」！呢單都未止，更利害嘅係，佢係世上第一個男人，帶領公眾認識葉劉美麗嘅一面，欣賞腿部線條，更加喺鏡頭面前公然「調戲」葉劉，深情獻菊花兼大讚葉劉「對腳好修長」。震撼！點會唔震撼！港台直播當晚你收到幾多張葉劉條腿Close-up相？
我諗唔使解釋咁多，總之嫣銷雲散啦！第一位呀！
by千頌C@堆填區
FB Page
MeWe Page
「與千頌C一起吃花生」MeWe Group
-----------------------------
掌握理財智慧 感受生活品味
investMAN全新網頁 優雅登場
-----------------------------
部署退休 輕鬆達至財務自由
點擊即睇《退休理財天書》
-----------------------------
【全球樓行】 Dream House零距離
屬於香港人的移民攻略
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
收市閒情 - 千頌C 舊文
來源 source: http://hk.news.appledaily.com
