操盤手劄記│揸綠債溝貨攻略（割柑人）
操盤手劄記│揸綠債溝貨攻略（割柑人）
綠債表現不似預期，繼首日跌0.3%後，翌日再跌0.05%。
又玩過山車！市場擔心經濟衰退，美股三大指數上周五高開後掉頭，道指曾跌2%，標指更曾跌2.3%，由1月高位跌逾20%，技術上墮入熊市；但大市之後再掉
頭，道指、標指分別收升0.03%、0.01%，納指收跌0.3%。以全周計，道指連跌8周，為1923年以嚟最長跌浪；標指連跌7周，為2001年以嚟最長跌浪；納指亦連跌7周，再創連跌紀錄。至於港股ADR比例指數，則低水216點或1%。
美股、外匯、加密貨幣免費即時報價，自選投資組合獲取相關新聞提示。
宏觀經濟數據顯示，滯脹、衰退風險增加，市場避險情緒升溫，資金流入債市，債價升債息回，美國10年期債息跌穿2.8厘，收2.79厘。那邊廂，美債見買氣；這邊廂，港債則見賣氣！政府發行嘅綠色零售債券（4252）上周四甫上市即破底，究其原因，一來，美息趨升、美元強勢；二來，市場再度議論港元美元會否脫鈎、香港會否被移出SWIFT，都令港元資產吸引力下降。
破底冇有怕 長揸冇得輸
綠債表現不似預期，繼首日跌0.3%後，翌日再跌0.05%。事實上，無論綠債，抑或2021年iBond（4246）、2020年iBond（4239），三隻政府發行嘅債券，帳面價都已跌穿發行價100元，上周五分別收報99.65元、99.4元、99.75元。三隻債券都係3年期，息率同通脹掛鈎，綠債包底息2.5厘，兩隻iBond包底息2厘。喺加息預期升溫下，雖然綠債息率較高，但距離到期時間較長，壓力亦較大。
美國3年期債息上周五收2.74厘，相對上，綠債2.5厘息顯得遜色。而且，喺美國進取加息預期反覆升溫下，外滙基金票據息率近日亦跟隨上升，對金融機構嚟講，買綠債管理流動性嘅誘因下降；對散戶嚟講，部分銀行嘅港元1年或以上定期存款年息逾2厘，揸綠債嘅誘因亦下降。未來幾日即使綠債散戶沽盤大致消化，相信債價亦只會喺稍高於發行價100元水平徘徊。
如果投資目標係抗通脹，取得實際正利率，咁綠債係值得投資！一來，息率同通脹掛鈎，即使環球高通脹傳導至本港，亦毋須擔心實際負利率；二來，息率仍比銀行定存為高；三來，可於銀行或港交所（388）二手市場買賣，隨時沽貨套現，比定存靈活。講到通脹，按政府統計處最新經濟預測，今年本港基本通脹維持2%。長揸綠債今年穩收2.5厘息，起碼跑贏通脹！
想穩健收息 好過公用股
近排無論美股、港股，都已淪為賭場。各類股票中，公用股向來係穩健收息之選，但如今買公用股都唔一定穩陣，股價亦可大上大落，相對上，債價比較穩定，即使綠債破底，現價只比面值低0.35%，同股票差好遠。以煤氣（003）為例，今年以嚟跌近三成，賺息蝕價。若揸咗綠債想溝貨，或冇貨想低吸，喺通脹預期升溫下，安全邊際回報最少要有3厘或以上，若債價跌至99.5元，總回報達3厘；若跌至99元，總回報達3.5厘，不妨留意。
割柑人
曾任財經記者、編輯，在本港報章撰寫財經專欄逾十年
www.fb.com/hkstockpicker
本欄逢周一刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com
