笑到最後｜科企裁員潮及搶人才（高明）
笑到最後｜科企裁員潮及搶人才（高明）
科網企業裁員表面上好似由馬斯克入主Twitter後大屠殺開始，實際上全年美國企業，甚至科技企業冇停過炒人。
科網企業裁員表面上好似由馬斯克入主Twitter後大屠殺開始，實際上全年美國企業，甚至科技企業冇停過
炒人，只係被其他聲音掩蓋。例如訂閱制健身單車股Peloton Interactive Inc.（PTON）今年2月已經裁員兩成，10月再裁餘下員工嘅12%，不過因為間公司本身仍然摸索緊有冇獨立存在嘅能力，所以裁員新聞令人覺得只係經營問題，唔係大環境事。
美股外幣即時報價 多國新聞任睇
Twitter裁員一半員工，大概可以話係帶起大型科企裁員潮，因為啲超級富豪睇完馬首富炒人雖然滿城風雨，但「都係咁咋」，結果人人都跟，較大單跟進係Meta（META）炒1.1萬人及Amazon（AMZN）炒一萬人，另外亦有股東逼Alphabet（GOOGL）裁員。冇咁多人留意同期亦有Salesforce（CRM）炒幾百人，coinbase（COIN）炒60人，以及傳咗好耐上市嘅Stripe炒14%員工。當然仲有FTX結業式消失。
企業大到咁上下，總有啲職位存在冗員，定期消除一方面削減成本及年資，另一方面亦保留少量緊張感畀現有員工，提升生產力，大致上公佈裁員後嘅Big Techs大企業都係反升，亦都見證市場對裁員嘅睇法。
長遠當然對整個市場有影響，開刀對象點都係有一定年資及收入嘅員工，冇理由炒係人都點佢做嘢嗰位阿四，未來嘅消費力無可避免會受影響，當然可以更樂觀咁諗，被裁嘅都係IT精英，總有幾個志同道合一拍，開檔新嘅生意創造另一科技神話。
但係問題係現時去到上市級數嘅唔少企業，例如上面講嘅Peloton，都係摸索緊生存價值，而年頭亦一度傳過亞馬遜買，證明唔少生意模式，未必有能力自立。
講到尾都係加息效應
裁員潮嘅啟示，仍然係變得更兩極，上曬岸嘅大型科技，人人想去返工，炒人隨時請得返，根本唔使搶人才；造大後上市但未有盈利嘅公司，裁員只係買時間，一係等下一個牛市來臨，股市集資再捱多幾年，一係好似Twitter等金主買。
講到尾都係加息效應，股市攞錢難咗，試驗性嘅生意冇新資持續，今次極端減息鐘擺至極端加息，喚醒我哋呢一代人對「增長優先」嘅質疑，未來就算再次減至超低息，Profit First「獲利優先」都將會係企業經營至選股嘅首要選擇。
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周三刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com
