【平民投資教室】錢俊：基本面支持股市真轉勢
平民投資教室
日期：2022-12-06
更新時間：10:27:08
環球股市年尾嚟個大反彈。美國標指重返4000點。港股更加犀利。淨係十一月勁彈26.6%，創1998年10月以嚟最佳月份。無入市或掟咗貨嘅固然失望，但更緊要係高追定睇定啲。
上半年炒美國加息快過預期，今個月已經炒美國聯儲局放慢加息步伐。息口對經濟嘅影響會過一段時間後先浮現，觀乎過去兩個月通脹數字加上聯儲局官員放鴿言論，似乎加息已漸見家鄉，因此呢個對股市近期最大嘅負面影響或將消退。
中港方面，經歷近期內地民眾對防疫措施嘅不滿後，中央似乎真係有鋪路轉軚嘅跡象。官媒引述國內科研團隊指Omicron致病力大幅降低，仲籲民眾不必過於恐慌。副總理孫春蘭喺上周抗疫指導上未有再提「動態清零」方針。亦有外媒指，本月初即將召開嘅政治局會議可能會發出信號，對疫情防控採取更務實嘅態度，更注重促進經濟成長。錢俊之前已經講過，中國開關前定必喺抗疫調子上作出改變以配合政策轉向。因此以上種種都並非空穴來風。股市弱勢或已出現轉折。
與其是但買美國或中港是但一邊，不如大細都買。美市表現有望轉趨穩定，風險較低。中港股則受到放寬清零步伐及中美關係等風險因素左右，消息正面時上升空間較大，但同時波動性亦大。如何平衡兩市嘅倉位，主要睇投資者個人風險承受能力。
3186 vs 2812：恆生科指以外嘅選擇
港股反彈中，科技股為其中嘅領頭羊。重磅股騰訊及阿里巴巴過去一個月升超過30%。想重投科技股，又未諗定或無時間研究買邊隻，相關板塊有多隻香港上市嘅ETF可揀。除咗恆生科指相關ETF，仲可以考慮中金金瑞 CSI 中國互聯網指數 ETF（HKG:3186）同三星中證中國龍網 ETF（HKG:2812）。兩隻ETF都係追蹤中證嘅中國互聯網指數，而前者只投資美國及香港上市嘅中國公司，後者則可以買埋A股。
成份股同比重方面，兩隻ETF都大同小異。重磅嘅阿里巴巴、騰訊、美團、京東均為兩隻ETF最大持股。另外有啲港人唔熟但內地卻係知名嘅科企，包括美國上市嘅物流商滿幫、及貝殼找房等。中金金瑞亦包含國內上市嘅手遊商三七互娛及金融服務商東方財富等。
管理費方面分別唔大，中金金瑞為0.72%，比三星龍網嘅0.65%稍貴。但前者喺今個月反彈當中表現較好，升51%，而三星龍網只有32%。然而過去三年間，中金金瑞就跌成25%，大幅跑輸三星龍網嘅7%。而且三星龍網都比較受投資者歡迎，基金規模都係中金金瑞嘅八倍，喺每日成交額中亦明顯較大，因此因為生意原因被下架機會都比較細，無咁擔心因突然下架導致被迫喺低位變現嘅隱憂。
想聽其他投資Topic？話我知：chinjun.column@gmail.com
FB: chinjun.etf
IG: chinjun.column
以上觀點僅為個人分析，並不構成任何投資建議。
平民投資教室 - 錢俊 舊文
本文作轉載及備份之用 來源 source: http://hksmedia.com
