要有如日本咁迷失十幾廿年並唔易，第一個條件，係國民嘅人均收入首先要增加到相當嘅水平，先有資格患上日本病。
近期人民幣下跌，港股更加唔好提，市場又有返啲「中國會唔會患上日本病」嘅言論。事實上，類似言論已講十幾年，既然講嚟講去都未同日本一樣，咁就更無可能中國會同日本迷失廿幾三十年一樣。
美股
外幣即時報價 多國新聞任睇
事實上，要有如日本咁迷失十幾廿年並唔易，第一個條件，係國民嘅人均收入首先要增加到相當嘅水平，先有資格患上日本病。具體少少用香港嚟作比較，好多人形容香港為「福地」，搵錢又多，世上好多先進嘅嘢曾經都係香港有啲先（近年不了，ChatGPT、Bard冇份，Taylor Swift都去新加坡開演唱會）。一個咁強勁嘅福地，應該比起90年代被就爆煲並進入迷失嘅日本好得多。
首先要夠富貴
但係數字上，福地香港人均GDP要到2014年，先正式超越日本。隨後幾年日本人均GDP越嚟越低，主要同幣值關係較大。
當然可以話香港人返工都係打風流工，主要收入嚟自物業升幅，但係數字上要等日本沉沒24年後，福地嘅水平先超過日本，香港走出沙士，配合北水及H股上市等大水喉，先超過日本，亦都證明日本本身嘅發展走得太前。
至於日本咩迷失，由十年延長到廿年，再推落去30年，講到今年日股已重上30年高位，仲講緊日本迷失。作為起標題口號，迷失幾廿年較容易上口，但係實際上好多人都駁斥過嘅呢種論調，主要睇法並唔係日本資產泡沫爆破後成個經濟迷失，而係2000年打後製造業受南韓及中國搶走低端訂單，漫畫島耕作則強調日本企業強勢時忽視海外市場，到想打嘅時候已經畀南韓三星LG霸曬。
純粹從結果嚟睇，一個經濟必定要由泡沫帶動，世上主流泡沫有兩種：樓市同股市，兩種各有好壞處，樓市推動代表，講香港應該冇太多人反對，好處係受惠人廣泛，缺點係地產主義取代生意，有腦不如買樓；股市泡沫推動，08年金融海嘯後嘅，美國就係一例，好處係用資本錢推動新科技，電動車、元宇宙、AI，概念就算錯，都產生一堆就業先，缺點係受惠人數少，有買並一直持有先有份，人數一定遠少過買樓，冇份受惠嘅一般人都只係打份工。
由股神畢菲特加碼日股，三菱、三井物產、住友商事、伊藤忠商事和丸紅株式，共通點係財閥同控制上遊生產設備和材料，撇除股神可能都要做任務，佢睇好即係日本或世界對呢啲生產設備需求強大，另一方面佢嘅介入亦令到日本地產泡沫推動經濟，轉型做股市泡沫推動嘅經濟，就算唔能夠產生美式嘅新科技潮，最低限度都追到個趨勢。
至於其他國家有冇患上日本病，日股指數計，日本已經好返，其他國家要患上日本病，首先要有日本患病前咁富貴，之後先可以診症。
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周六刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com
