【平民投資教室】錢俊：買樓買鋪買房託仲合時宜？
平民投資教室
日期：2023-08-15
更新時間：16:10:58
呢兩周港股又回到地獄。早幾星期錢俊提及有關尋找抗跌嘅板塊，當中有提到房地產，然而本地薑嘅領展表現令人失望，近期連公司CEO都減持公司股票。
事實上香港地產近年面對多方
面嘅負面因素。住宅方面，受到美國引致港銀加息影響，過去一年起住宅物業已經係「租平過供」，除咗本地投資者計數後覺得無肉食，往年主力嘅內地投資者因國內經濟疲弱，加上或者本身盤生意已經蝕緊錢，唔洗撲水賣埋香港間樓已經偷笑。因此油塘新盤低開都係意料之內，中短期要回到數年前嘅升勢應該好難。
商鋪方面，原以為今年香港開關應該可以重拾動力，點知都係一箱情願。國內同胞落嚟只係去麥當勞道食麥當勞，奢侈品以至藥房都返唔到過往光境。甚至本地僅有消費力，都拎埋返深圳消費，大把餐廳商店大嘆香港已經無夜生活，連政府都要考慮搞大笪地經濟救亡。
另一邊箱，內地公司大多忙住撲水，以往不問價錢搶香港一線寫字樓嘅情況絕跡。加上中美關係轉差及在家工作盛行，外資不斷縮減辦公室面積。上周都有消息指連中環大地主置地都想賣埋交易廣場三期，雖然公司否認，但大家都感受到負面情緒之大。
以領展為首嘅香港上市房託，由於主要都係持有香港物業，然而住宅、店鋪、商廈三線都受壓，未來香港房託或難再以「進可攻退可守」見稱。
INDS：物流房地產 投資世界
咁係咪就係房地產已死？當然唔係。由其係美國加息漸見尾聲，息口壓力可舒。此外，跌市時揸住層樓至少有得收租，樓價都比股價波動程度低，始終有個優勢。不過投資者應該睇更大嘅投資森林，比如考慮埋其他地區及另類行業。
Pacer Industrial Real Estate ETF（US:INDS）就係例子。基金投資全球已發展市場嘅工業行業公司及房託。過去五年總回報達49%，相反好多香港上市房託係跌超過40%。雖然如此，管理費都只係0.55%，就投資到全球多個主要市場，認真抵玩。
同時，工業或物流行業相對其他板塊與經濟相關度較低，好多時啲大租客一租就租十年八載，租金回報穩定。加上未來市場因電子商貿及科技發展，對物流及數據中心嘅需求增加，呢方面對樓價增長都有支持。
相對嚟講，INDS嘅缺點就係派息較低，只有2.8%，香港上市房託派息普遍都5厘以上，不過呢個都係一般美股嘅特色。你會唔會為咗派息而唔介意股價貶值？
想聽其他投資Topic？話我知：chinjun.column@gmail.com
FB: chinjun.etf
IG: chinjun.column
以上觀點僅為個人分析，並不構成任何投資建議。
平民投資教室 - 錢俊 舊文
本文作轉載及備份之用 來源 source: http://hksmedia.com
