Google喺AI大趨之中只會更重要，而唔係衰落。
雖然只係去到8月，大家見標題寫今年最錯睇法，可能會問：咁快回顧？一定係股價跌輸得勁！事實上，股價升升跌跌，已經好難分清啱定錯，買入後好即時可能係錯，隨後啱哂，之後又錯返，呢啲嘢有返兩三年股齡都會睇化。
美股外幣即時報價 多國新聞任睇
入正題：今年最錯嘅睇法係，覺得AI人工智能嘅ChatGPT出現，微軟（MSFT）靠OpenAI終於有機會挑戰無可取代嘅搜尋器霸權Google（股票：Alphabet（GOOGL）），後者開始會好似其他上一代霸權股咁慢慢被分食市佔。
錯喺邊？先唔好講Bing嘅AI搜尋器表現，或者ChatGPT對Google嘅語言生成AI Bard，從更微觀角度，Google喺AI大趨之中只會更重要，而唔係衰落。
高明最近開始用自動化工具，一用，就發覺Google已經植根喺網上太深，好多唔同嘅工具起點，都係Google，但呢個並未去到屈機位。
價錢平競爭力最大
真正屈機位係Google好多嘢免費。的確，Google百足咁多爪，好多工具都幾落後，同專門做嘅軟件比好原始。但係有乜好得過，佢嘅工具係免費任用。事實上ChatGPT做起點，每個月盛惠20美元，跟住再買多套自動化工具，大約每月30美元，本身再加埋既有已訂閱嘅其他服務，唔係好多錢，但每一件只為一個功能而訂閱，就係一種浪費。
因為有AI，Google嘅免費資源喺駁入自動化工具入面變得更重要，無論如何都要用。
至於搜尋器競爭，已有Google嘅搜尋器，同ChatGPT，帶有語言生成嘅搜尋器變咗兩者中間嘅定位，浪費咗時間後，亦唔知佢準唔準確，不如一開始ChatGPT再自己Google查核，可以話未發展到好用嘅階段。暫時亦談不上取代。
以上嘅睇錯，究竟有咩啟示？答案就係無論科技點轉變，永遠都係價錢平，就係最大競爭力，話之你高科技電子零件，都不敵深水埗特賣場。情況就好似畢菲特師傅格拉咸所講，價格就係最大武器，越平買安全邊際越大。
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周六刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com
