【平民投資教室】錢俊：越南愈難愈愛
平民投資教室
日期：2023-08-22
更新時間：10:47:50
近一兩年中國受到美國嘅投資限制，加上至今為止中國後疫情反彈未如理想，內外交織底下一蹶不振。國際投資者開始尋找中國以外嘅快速增長國家。然而新興市場都唔係個個國家好，迫使投資者繼續留
意亞洲。而近年較多人講嘅包括越南。
多年前，越南連同印尼、南非、土耳其同阿根廷，被投資者稱為「VISTA展望五國」，為金磚四國之後被睇好嘅地區。近年越南經濟都喺東盟多國當中快速掘起， GDP過去25年漲15倍，過去六年有四年係東南亞GDP增速最快嘅國家。
另一個看點就係受惠於地緣政治因素。由於近年中國受歐美國家多番限制，好多外國公司就算仍然喺中國設廠，都會希望喺其他地方落地以分散風險，而越南近水流台先得月，加上人工成本低，得以食到製造業鏈轉移呢條水。同時越南都無喺中美之間靠邊站，仍然與中國關係良好，喺鷸蚌之中漁人得利。
2804/3004：喺香港買越股
由於越南股市頗為偏門，一般投資者未必了解個別公司情況，因此若有興趣買越南，買ETF投資成個市場都係一個方法。香港上市實貨ETF當中分別有PREMIA MSCI 越南 ETF（HKG:2804）同南方東英富時越南30 ETF（HKG:3004），兩隻基金今年均升約12%。兩者成份股都差唔多，以房地產、必需消費品同金融股為主。
高潛在回報背後當然係高風險，由其越南貴為MSCI前沿市場成員之一，連同東盟大部份國家達新興市場嘅水平都未達到。因此其實全球投資越南市場嘅資金仍然好少，若果一兩批大戶買賣，股市比較容易被舞高弄低。
其次亦都係政治不穩定性呢個新興市場通病（雖然近年一啲歐美成熟市場都有呢個問題）。越南雖然經濟經歷改革開放，但政治體制始終係以越南共產黨主導。今年年初越共中央總書記阮富仲藉肅貪為名，令僅上任兩年、原以為係接班人嘅國家主席阮春福「被退休」，往後經濟政策會否受政治利益掛帥存有疑問。
再者就係貨幣波動性。細市場嘅貨幣波動性高，除咗小小事俾大鱷追擊邊成金融風暴，若出現股升匯跌情況亦會影響投資回報。
因此棄中國買越南嘅風險仍然好高，若果想減低投資中國風險，可以考慮轉投一啲亞洲股票或新興市場股票ETF，買返同樣係新興市場嘅level比較合理。至於前沿市場，都係小賭怡情比較好。
想聽其他投資Topic？話我知：chinjun.column@gmail.com
FB: chinjun.etf
IG: chinjun.column
以上觀點僅為個人分析，並不構成任何投資建議。
平民投資教室 - 錢俊 舊文
本文作轉載及備份之用 來源 source: http://hksmedia.com
