高明未畢業已經做緊嘢，畢業後順理成章搬出去住，一開始係租樓。
油塘一個新盤減價，雖然可能動搖咗部份人對樓市前景嘅睇法，但係呎價仍然係萬五蚊均價，仍然係貴，符合大多數網上對香港樓市嘅評論：唔係吖我嗰區仲係好貴，邊有跌。
美股外幣即時報價 多國新聞任睇
社交媒體成主流，「我」變成世界嘅中心，
評論任何嘢都係由自我出發，開口埋口我我我，所以本欄都順應潮流：買樓好難咩？唔係呀，我買樓嗰時好易。
高明未畢業已經做緊嘢，畢業後順理成章搬出去住，一開始係租樓，最初同朋友夾租，後尾想要多啲空間同埋租金唔貴，自己租一間都唔難，最後揀咗九龍灣得寶花園，大概符合當時準則：有地鐵、屋苑，同埋最緊要平。
因緣際會，租緊嘅時候遇上金融海嘯，落樓下啲地產舖睇，少數樓唔使一球，不過都係單橦岩岩巉巉嗰啲，高明睇過樓，間屋入面見到鋼筋嘅都有，其他似樣少少嘅樓都係球零。
金融海嘯供平過租
金融海嘯喎，冇咗份工點算？其實金融海嘯嗰年香港經濟算幾好，我認識嘅所有同學都做緊嘢冇人失業，高明畀人挖咗去做候選人助理，人工係銀行認為可以上會買樓嘅水平。
見證經濟好嘅重要指標係業主加我租，本來我完全冇諗過同佢傾，好似之前搬屋租第度就算，點知去地產舖一睇，加租後嘅租金，係同區最低嘅價格。即係如果繼續住，就要硬食兼夾多謝業主加得少，我嗰時已經有少少厭倦每兩年搬一次，所有傢俬一搬就爛，要掉曬從頭再買過嘅生活。
偏偏嗰時醒覺有另一個選擇，就係買，嗰年仲未有咩壓力測試SSD嗰啲，兼夾仲有5%首期上會，計返樓價其實拎幾皮嘢出嚟就有間樓，加上聯儲局量化寬鬆，銀行按揭利率少過一厘，簡單撳計數機，就算九成上會，供樓都平過租，於是搬咗過隔離淘大花園，屋苑質素稍為好過德寶，但係我每月嘅住屋開支少咗兩千幾蚊，後尾用日一金田嚟買衫，一毫子都冇用嚟儲蓄。總之好易，買咗樓先係easy mode，一年去多幾次日本。
拉返長往後10年去睇，當時嘅決定食正之後10年嘅超低息環境，由自住去到升值都賺，往後亦都冇再出現九成上會可以供平過租，就算最近兩年樓價回落，因為息口上升，都完全唔接近當時嘅情況。
我唔會用正確決定嚟形容，因為係當時環境逼出嚟最合理嘅做法，短視啲睇，每月幫我慳咗兩千蚊租，仲得到間樓至2047年嘅擁有權，任何人都會咁樣選擇。
如果特朗普遲出世50年，可能都做唔成紐約地產大亨；同理，如果馬斯克早出世50年，都應該唔會憑電動車成為首富。時代自然會推你做某啲決定，所以本篇文章以身作則，成篇評論只係講我我我，至於「你」應該點做，依家唔興教人做嘢，所以都係你自己上社交媒體搵答案。
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周六刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com
