甫踏入9月，港股上周五即因颱風「蘇拉」吹襲而停市。本港風雨飄搖之際，中美卻相繼傳來利好股市消息。
甫踏入9月，港股上周五即因颱風「蘇拉」吹襲而停市。本港風雨飄搖之際，中美卻相繼傳來利好股市消息，中國方面，喺上周四晚公布調低存量房貸利率後，上周五即有多地落實「認房不認貸」，包括「北上廣
深」四大一線城市；不過，樓市鬆綁因素，今日先會反映。美國方面，上周五公布嘅失業率出乎意料上升、工資增長則放緩，反映勞動力市場降溫，聯儲局可能暫停加息。
美國勞動力市場降溫，但同日稍後公布嘅ISM製造業指數則高過預期。上周五美股道指、標指分別升0.33%、0.18%，納指跌0.02%；美債10年期孳息由日內低位4.06厘回升至高位4.2厘，收4.18厘，升1.8%；美滙指數重越104關，收104.26，升0.6%。喺中國再出招救市下，納斯達克金龍中國指數升3.2%。港股ADR比例指數高水236點或1.3%，藍籌科技股ATM美國股價分別較香港高3.3%、2%、4.2%；外資炒港股跟隨中國減股票印花稅，港交所（388）ADR亦較香港高2.6%。
下載Yahoo財經APP
美股外幣即時報價 多國新聞任睇
人行阻貶值 降外滙存準率
其實，市場最驚嘅唔係聯儲局係咪再加息，反正6月點陣圖已預示今年加息路徑，息口幾時見頂已心裏有數，個市已price in；喺各類資產中，市場最驚嘅亦唔係代表避險嘅「環球利率之錨」美債嘅債息飆升，而係代表逐險嘅「環球流動性之源」美元嘅滙價飆升！金融市場最關注嘅係資金成本，喺兩方面反映，除咗利率，仲有主要拆借貨幣嘅滙價，若其趨升，意味資金成本趨升。
由於環球資產都直接或間接由美元計價，美元作為環球資產嘅定價基準，所有投資資金嘅來源，一向係市場嘅「風險之母」。過往每當美元持續上升，環球資產都會下跌，反之亦然。如今美滙指數再升破下降軌，重越104關，變相令其他市場貨幣受壓，尤其亞太區等新興市場。事實上，上周五人民幣喺人行突然宣布9月15日起下調外滙存款準備金率2個百分點，在岸價仍跌0.03%，收7.2606兌1美元；離岸價則回升0.11%，收7.2669。
若減印花稅 港交所必受惠
港股打風停市前夕，上周四恒指收18382，跌0.5%；喺MSCI系列「換馬」帶動下，成交激增26%至1,365億元。恒生指數系列「換馬」則因上周五停市，推遲至今日收市後實施，明日生效。睇走勢圖，恒指失守短期上升軌，升勢放緩，參考恒指牛熊證重貨區，短線支持睇18200，阻力睇8月中裂口19000。港股短線反彈幅度，好睇人民幣強弱，畢竟恒指成分股三分二為中資股，收入以人民幣為主。
自從特首李家超上周話會設立專組研究增加港股流動性，市場即憧憬減股票印花稅。短炒博反彈，可揀科技股龍頭，一來股份流通性好，二來有業績支持，反彈力較高；另外，可揀港交所，若減印花稅，可刺激交投，港交所（0388.HK）必受惠。睇港股ADR表現，外資炒救市主要都係炒呢啲股份。不過，要留意係，就算減印花稅，只利好短期情緒，港股要轉勢回升，長期始終要睇基本面。
割柑人
本欄隔周一刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com
