【平民投資教室】錢俊：買綠債還是造定期有咁難諗咩
平民投資教室
日期：2023-10-04
更新時間：10:02:21
上周港府發4.75%保底債券截止，受上一期開價潛水，今期明顯比之前冷清。但就算無抽，其實都值得考慮喺今批債券上市時喺交易市場買入。
首先最簡單買政府債券一般都係作為
股市波動嘅緩衝。前一周美國聯儲局出現「鷹式暫緩加息」。雖然如市場預期唔加，但仍然預計今年或再加多一次息。議息後美股及隨後港股都明顯受壓。雖然加息都會影響債價，但理論上買債坐貨收最終仍可獲4厘幾回報，都算唔錯。
其次係現時愈來愈接近買債黃金期。雖然今年餘下時間仍會否加息未明，但加息周期幾可肯定接近結束，甚至市場預期下年有機會減息。傳統智慧加息周期完結就係買債最佳時間。就算仍有機會加息，而依家近5厘收益率，只要唔出現好似上一年大幅加息嘅情況，蝕本機會都較微。
當然好多人都情願造定期都唔想買債而面對跌價風險。但造定期最大問題就係缺乏流動性，若果市況轉變或個人需要套現就好煩。而債券喺市場上可輕鬆放售轉倉都容易好多。
正所謂小朋友先做選擇，又唔洗全部買曬一邊，只要你夠錢，就可以將部分錢做定期又買啲綠債，平衝兩者優劣。
3077：浮息票據 ETF回報媲美綠債定存
再講，除咗定期同綠債，市場上都仲有好多類型嘅息口相關投資工具。比如Premia 美國國庫浮息票據 ETF（HKG:3077），就投資美國政府發行嘅一籃子浮動利率票據。基金經常性開支僅為每年 0.15%，尚算抵玩。
所謂浮動利率票據，可以話係以息口去決定債券回報。根據基金資料顯示，ETF投資嘅票據係基於3個月美國國庫券利率，每週重置相關證券嘅票面利率，因此就算息口上調，票面利率都會跟住做返相同回報，因此債券就唔會跌價，簡單啲講就係無債券要面對利率上升債價跌嘅風險。加上打著美國國債旗幟，絕對係極低風險投資。
回報方面，過去一年回報為4.8%，拍得住今期綠債同定存息率。然而，正如之前所講，未來一年有機會減息，因此對短債而言就係減息減回報，相反長債喺減息下就有賺價潛力。因此如果長遠的話買返美國10年期國債或者更為理想。不過香港市場就未有相關ETF，要去美國ETF市場或者開債券戶口先可以沾手。
想聽其他投資Topic？話我知：chinjun.column@gmail.com
FB: chinjun.etf
IG: chinjun.column
以上觀點僅為個人分析，並不構成任何投資建議。
平民投資教室 - 錢俊 舊文
本文作轉載及備份之用 來源 source: http://hksmedia.com
