笑到最後 - 高明 2023年11月11日
特朗普在任美國總統期間有減稅，增加拎返屋企錢多咗，使錢鬆手經濟預期好。 (Alon Skuy via Getty Images)
CNN最新民調顯示，如果2024年11月嘅美國總統大選係現任總統拜登對前任總統特朗普，特朗普以49%比45%支持度領先拜登，將會再次當選。
美股外幣即時報價 多國新聞任睇
拜登任內美股創歷史新高
雖然上面兩位未正式成為美國民主黨及共和黨參選人，但現任總統正常唔會換第二個去選，而特朗普黨內支持度等於第2至第20名嘅總和甚至多過，如無意外都係佢兩位選。
政治、美國民生等問題就暫且不說，畢竟如果唔係住喺美國，總統選舉最大影響都係利率政策，以及美股表現。
資料顯示，拜登上任以嚟，美股表現為：標普升15.22%、納指升3.27%、道指升10.17%。相對特朗普任內：標普升67.26%、納指升137.56%、道指升56%。公平啲講，拜登任內美股創歷史新高，只係之後不振；特朗普任內因疫情亦大跌過，但短時間減息救返生。即使有呢兩個前設，無疑特朗普年代比較好炒。
箇中原因好簡單，過去美股，只要以下三樣嘢：通脹、利率、油價，處於低水平，牛市自然出現。以上三樣嘢部份有因果關係，例如通脹同利率；部份又有從屬關係，例如油價係通脹率一部份。
美股估值貴冇所謂，總之息、油、物價要平。 (Gary Gershoff via Getty Images)
息油物價要平
通脹及油價高企，令市場覺得啲人拎曬啲錢去買能源同基本生活開支，無閒錢去買其他消費品，特別係新興行業產品，導致預期經濟差，影響股價；利率更直接，買債已超過5厘息，唔會瞓身買股票，債、定期等直接成為股票爭奪資金嘅競爭對手。
拜登嘅問題係任內出現俄烏戰爭，油價一升通脹跟住升，利率又要同時升，結果就造成任內不利美股嘅環境，亦唔排除佢係有心，幫嚇美國年輕人上車買美股，此乃後話。
特朗普在任期間，仲有減稅，增加拎返屋企錢多咗，使錢鬆手經濟預期好，反映喺企業盈利上就有利股價。唔好睇少減稅，英國短命首相卓慧思試過，以落台告終，批評佢嘅人用「中五經濟學」之類嘅論述批評，減稅要靠未來發債亦被覺得不可持續。不過，特朗普係生意佬，本身形象已經較政客易啲令人相信搞得搞，再加上減稅同期亦不斷挾美國企業回歸美國創造就業，減稅率但撞憬交稅人口多咗。
回到正題，總之美股牛市嘅基礎，就係一個平字，美股估值貴冇所謂，總之息、油、物價要平。特朗普之前話佢做總統，俄烏戰爭一日內停火，相信會搞掂埋以巴戰爭，連帶其他有機會發動侵略戰嘅國家都要停手。本來通脹已經受控，如果停戰，油價肯定向下Gogogo，到時美股以年計嘅牛市又要再開始。
高明
IG
作者簡介︰賺錢係目標，炒股係手段，專欄記載由手段到目標嘅過程。
本欄逢周六刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com
