今日高明想深討嘅係恒指40,000點，同時納指5,000點，世界嘅模樣究竟會係點？ (rob dobi via Getty Images)
沈大師振盈最近接受傳媒專訪，又再次成為市場熱話，沈大師喺財經評論界影響力第一，應該冇乜爭議。其中內容講到：2024年，港股和美股可能會出現逆轉，
納斯達克指數更有可能跌至5,000點，而恒生指數來年有望升至40,000點。
美股外幣即時報價 多國新聞任睇
恆指見四萬 世界大可同
沈大師今次預測是否準確？仲有個鬆啲月就開始2024年，到時就知；係咪一般網民講嘅明燈？本欄對呢個話題興趣不大。今日高明想深討嘅係恒指40,000點，同時納指5,000點，世界嘅模樣究竟會係點？
手機：如果納指五千點，恒指4萬點的話，大家主要嘅手機應用程式應該係華為夾鴻蒙，以及騰訊（0700.HK）自己唔出機但雄霸另一半嘅OS市場。蘋果就步Nokia後塵出售手機業務。
上網：阿里雲、華為雲佔絕大多數，天翼雲全球第三，然後AWS、Azure及Google Cloud喺全球餘下嘅35%上爭食。
網購：先唔講咩亞馬遜（AMZN）阿里巴巴（BABA）大定細，黑色星期五成為美利堅小眾國嘅小眾國內折扣日，取而代之，全球「電商」都會跟11月11日光棍節減價促銷。
如果納指五千點，恒指4萬點的話，大家主要嘅手機應用程式應該係華為夾鴻蒙，以及騰訊（0700.HK）自己唔出機但雄霸另一半嘅OS市場。 (Future Publishing via Getty Images)
鬥搶中芯零納米 NVDA先達減價賣
晶片：全世界電競隊伍爭相搶購中芯（981）最新推出嘅0納米顯示卡Zero，Nvidia（NVDA）啲卡放喺先達暗角減價出售。
汽車：港女Call滴滴打車，見到司機揸比亞迪（1211）會覺得賺咗。港男最新平價溝女戰車係比亞迪三系，比亞迪車主自組車主會，揸比亞迪當正揸波子嘅感覺。網上有另一班人批評比亞迪車係「比車」，車主係「比L」。
AI：OpenAI炒Sam Altman只值得網媒用50字報導，因為只係一間普通網上公司。商湯（020）人事變動先足以影響旗下員工，如果炒核心成員，過百個員工會聯署公開信話共同進退：你炒佢，我同佢一齊過檔文言一心。
社交媒體：反而最無驚喜，因為鬼仔鬼妹一早用曬TikTok， 不過字節跳動要喺香港上市並且納入成為恒指成份股。
睇片：首先愛奇藝（IQ）要喺香港上市。另外，Netflix（NFLX）近年全球化某程度都要多謝韓流，一係愛奇藝成為韓劇全球首播點，甚至製作嘅金主，交出一套「魷魚遊戲」同等全球影響力嘅劇集；一係中流取代韓流，中星成為鬼妹追捧嘅對象，好似呢幾年鬼妹去南韓搵Korean Romance咁，未來去搵Chinese Romance。
其他：納指以科技股為主，但其成份股也包括非科技類別公司，如零售、醫療保健等行業，包括Costco（COST）、百事（PEP）、Lululemon（LULU）。東升西降之下，Costco應該被邊緣化貼錢求你入去買嘢，取而代之全球人類以進入中國版本嘅會員為榮；百事當年打可口可樂（KO）策略係併飲食連鎖店，繼而賣百事可樂，中國版大概係海底撈（6862）倒返轉做，推出飲品賣到成行成市，幾百磅美國肥人當海底撈飲品係水咁飲；港女至愛lululemon瑜珈褲，未來應該港女最愛李寧（2331）瑜珈褲。
股票指點嚟自成份股股價，股價嚟自業績，業績講到尾就係有人幫襯。只要有足夠嘅人幫襯，上述嘅情況發生其實唔難。
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周六刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com
