唔好睇少利息，無數有錢人、富家子弟、專家師奶，為咗追逐多一厘息，不惜犯本。 (Thapana Onphalai via Getty Images)
美股再一次派聖誕禮物，道指聖誕假前夕8連升，雖然一度單日轉向，但翌日星期四又再升過，作為太平洋以東嘅國家，道指突破4萬點只係時間問題，東
升西降又再次被證實正確。
美股外幣即時報價 多國新聞任睇
不過，美股上升背後嘅動力，係憧憬息口見頂，明年減至少三次息，對高明而言，如果再次重返冇息嘅年代，實在有啲可惜。
當然，息口見頂同零息，中間有好大距離。同理道理，現時美國聯儲局目標利率5.25厘至5.5厘，雖然有人話「高息」，但歷史上卻係低息。息口都只係相對。
絕對嘅事係，當資金有成本，處於另一方嘅儲戶，就會得到延遲消費嘅好處。金融學上最偉大嘅發明，一定係利率，特別係由無風險嘅債券至風險偏低嘅定存，都係持續咁奬賞大家儲蓄，派發利息，真金白銀咁鼓勵大家財務上負責任、唔好月月清、好好控制自己嘅慾望，透過成為一個更好嘅人，每個月（債券唔一定按月，都係一個時期）畀錢你奬勵你，本金又唔會除淨折舊，錢，就係世上最優質嘅派息資產。
延後消費有回報
唔好睇少利息，人爭一口氣、佛爭一注香，無數有錢人、富家子弟、專家師奶，為咗追逐多一厘息，不惜犯本。由以往雷曼迷債、到內房債券，以及買樓收租，或者富二代買酒店工廈，為嘅就係多出嚟幾厘息，部份富豪二世更為此沽盡老豆大半生儲落嘅磗頭。回頭一望，原來如果美帝肯加息，定存利息可能已經跑贏上述各項嘅回報率，又或計及風險後，搞咁多不如定存。
如果利率長期處於：借方要諗過度過先借、及存戶覺得值得延後消息嘅水平，金融發展會更加導人向善，好多呃人多一厘半厘嘅騙局冇市場，古靈精怪只為上市退出exit嘅冇盈利項目最初已經冇人投資自行摺埋唔使上市生靈塗碳，有資金嘅人踏實啲諗炒樓前放入去造定存冷靜嚇多啲人買得起自住樓。
延後消費有回報，教仔女唔好亂買嘢，有利息嘅年代，只需要動之以利，一個月後派息自然會明。唔使嘥口水講大道理，仔女又冇興趣聽。只要仔女肯為利息而控制多餘慾望，下一代活得比上一代更好係必然嘅事。
本欄當然唔相信現水平會立即回到零利率，但翻睇美元價值嘅百年歷史，一向都係以貶值及剝削存戶為目標，持有現金最終必輸。所以如果要回顧2023年一件事，要感恩，就係感恩美帝大發慈悲，畀一年大家收嚇息做嚇婆仔。
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周六刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com
