笑到最後 - 高明 2024年2月10日
美斯喺得兩萬八觀眾嘅日本踢，喺有三萬八觀眾嘅香港神隱。 (Hiroki Watanabe via Getty Images)
1. 啱啱過去嘅星期三，高明毅然決定前往東京睇國際邁亞密對神戶勝利船嘅友誼賽。美斯上陣30分鐘，恩尼斯達開球禮，蘇亞雷斯打倒掛，連平台費1.1萬日圓，都叫值回票價兼當提早賀年。
美股外幣即時報價 多國新聞任睇
2.美斯喺得兩萬八觀眾嘅日本踢，喺有三萬八觀眾嘅香港神隱；喺沙地則傷住都要踢幾分鐘，肯定唔關曬合約事，因為一定有受傷免踢條款。關事嘅係同你有冇回頭生意做。
3.行動已經證明一砌：沙地搞足球太粗獷，但油王係大金主，唔可以得罪；日本未必好出得起錢，但日本足球值得尊敬，未來做教練班主足球學校大把機遇，一樣唔可以得罪；只有香港，錢又出唔起，回頭生意又唔多，冇誘因要取悅你。
4.做得球王一定熱愛足球。日本幾十年足球快速發展，所有踢波嘅人都會尊重。冇心機搞但又要威，就畀錢，上一代中超，今代沙地。香港足球一睇排名人哋已覺得你唔重視足球，突然有政治任務先去搞，仲要出唔起錢先係香港最大危機。
5.好多人搵到公開資料砌圖，發現第一日美斯練波合照嗰啲勁友善，過咗第二日消息傳出政府想請球王去巡地盤後就180度改變。我討厭政治，最大疑點首推份一球巡地盤合約。
100萬合約疑點最大
6.樂觀希望唔會有以為自己英文好叻嘅AO，拎住份只得11.86萬歐元（100萬港紙）嘅合約衝埋美斯度講「I want you do this do this」。首先唔講AO求人做嘢嘅態度，淨係個銀碼已經同足球世界脫節。
7.可能有人受移民潮華文報道洗腦，以為「鬼佬好窮」，求其100萬港元可以使死人。一個覺得「體育冇經濟效益」嘅民族，點樣可以理解人間地獄英國一個鎮仔嘅足球隊，可以出得起幾萬鎊一星期簽個19歲青訓5361;仔。100萬港紙兌返英鎊，只係人哋一個禮拜至半個月嘅收入，你開個美斯20年前嘅價出嚟，畀人藐都唔奇。
8.Hong Kong Stadium中文無端端變咗「香港大球場」，容量得4萬人就叫大，求其一個球迷喺歐洲睇波返嚟都知係細場，更加唔好提歐洲球場已經發展到高科技閂蓋換草皮。但就可以理解到點解100萬港元有人覺得係多。
9.日本個場坐唔滿，吉位足夠請哂三萬八個香港球迷入場。如果政府夠膽量包機包酒店包門票，連同財團贊助，財大氣粗請哂有入場嘅嘅球迷去東京睇，或者救得返「香港出唔起錢」呢個刻板印象。
10.明明個個出嚟嘈美斯嘅都好有錢，偏偏就唔夠財大氣粗，100萬港元就曬人冷，30年前賭神張瑞士銀行本票都3,000萬美金。有傳出場費1,000萬美元，都未夠30年前賭枱玩一局。
11.出唔起錢又想轉危為機，唔好再吟吟沉沉，免費醒多條好橋畀你：受重傷嘅美斯經過香港呢塊福地後不藥而癒，去到日本幾生猛，足見香港真係一塊福地！
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周六刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com
