2000年打後日本迷唔迷失已經同90年代泡沫爆破無關，根本係日本製造喺市場競爭下輸咗縮細規模嘅結果。 (shih-wei via Getty Images)
好多時傳媒會用迷失二、三十年形容日本90年代泡沫爆破後嘅經濟。
美股外幣即時報價 多國新聞任睇
日本迷失一詞彙最初是在日本國內被
提出，隨後概念被英語媒體及國際社會所廣泛接受。隨著時間的推移和經濟狀況的持續，這一描述也被擴展至稱為失去的二十年或失去的兩個十年，以反映經濟低迷的持續時間更長。之後人雲亦雲好多人都話係lost decade。
不過，早有研究講過日本90年代中經濟已經出現復甦，不幸遇上97年金融風暴再捱一劫。
事實上，2000年打後日本迷唔迷失已經同90年代泡沫爆破無關，根本係日本製造喺市場競爭下輸咗縮細規模嘅結果。呢一點就連長期連載漫畫系列「島耕作」都經常強調，一方面日本產品面對南韓及中國的更平價產品競爭，另一方面則係80-90年代日本內需太強，日本企業忽略國際市場被南韓搶佔，當然隨後更加有中國更平嘅產品搶國際市場，遇上歐美一般人工資增長有限，made in China幾乎橫掃全球，與其話2000年後嘅日本係迷失，不如直接話輸咗。
另一更多人知嘅當然係半導體，90年代日本唔同嘅大廠幾乎雄霸成個行業，除咗最上遊嘅設計及技術仍然係當年嘅英特爾（INTC）把持外，中下遊則係日本天下。不過，日本幹式技術發展到盡頭，被台積電（TSM）及ASML（ASML）嘅浸潤式技術取代，近乎退出設備、中遊代工等霸主地位，最多只可退到材料業務。
日股破頂 過去30年經濟成績表
今年日股破頂，可以話係為過去30年日本經濟派成績表，翻查日經指數成份股，細睇例如第二大成份股東京電子（8035.JP），係全球五大晶片設備股之一，而事實上第2至第10大成份股，都同現代半導體、電子及機械人有關，全部業務都跟得上近年幾個電動車、半導體等嘅當炒概念。
廣告
日本最大市值企業豐田汽車（7203.JP）一路都堅持混能，最新一波美帝傳媒唱衰電動車，反而評選豐田混能車Prius最環保，跑贏一眾電動車。
另外，軟實力方面，日本嘅版權IP遇上YouTube及Netflix(NFLX)浪潮，成為世界一個主要娛樂來源，近期龍珠漫畫作者鳥山明去世，全球畫迷追悼就見到佢嘅軟實力。
所以話日本迷失，究竟點定義迷失？站喺泡沫經濟角度，炒股炒樓就最醒，冇股樓炒就係迷失。站喺實業角度，股票嚟自公司，公司就要做實業，係實業就唔好分心炒炒賣賣，炒炒賣賣先係迷失。
每一次金融危機前都係泡沫經濟，近代全世界都不外乎炒股炒樓，暫時得美帝可以泡沫經濟爆破後轉型科技之餘同時繼續炒股炒樓。日本就次一級，過去三十年抹去泡沫做實業，其實係辛苦錢。
至於其他地方，例如金融風暴泡沫爆破後，迷失7年後投向更大嘅股樓泡沫，最新招數撤辣再向泡沫投下神聖一票。過去30年邊個迷失，由於已過去再講都無謂。跟得到世界發展潮流就唔係迷失，未來30年，迷失嗰個應該唔係日本。
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周六刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com
