笑到最後 - 高明 2024年5月25日
Nvidia績後再升一成上下，KOL、網民同聲歡呼。 (BING-JHEN HONG via Getty Images)
Nvidia（NVDA）績後再升一成上下，KOL、網民同聲歡呼，印證咗高明曾經講嘅東升西升先係最好嘅情況，淡友只係少數，同埋只限個別時空，長線上升先符合絕大多數人嘅核心利益。
美股外幣即時報價 多國新聞任睇
同日道指下跌1.53%，神奇七股亦只得Nvidia上升，同系晶片股帶動力都唔強，整個大市只係升一隻，難免會引嚟一啲人覺得一股獨大，而呢個亦係事實，但係美股一股獨大其實係常態。
先講近︰2023年頭5個月，標普ETF升9.1%，同期蘋果（AAPL）及微軟（MSFT）升35.5%及27.5%，當然兩者係指數成份股，佢哋升又會推動指數升。兩間公司合計喺標普500指數中權重達到13.8%，顯示出少數大型科技公司對指數的巨大影響，撇開Nvidia，舊年都係兩股獨大。
再遠啲2000年dot-com泡沫期間，當年嘅大型科技公司股票如Cisco（CSCO）、Intel（INTC）和Microsoft一樣係推動納指上升主要股票。
唔係一股獨大年份，一係整體冇乜點升，一係2020年至2021年咁，乜股都升，不過依家利率較高，相同情況好難立即複製。
股市講到尾都係人嘅市場，暫時仲未有AI或其他生物可以開股票戶口同畀錢去買股票，影響股價100%來自人。人一日雖然有24小時，但扣除食瞓屙行行企企碌手機，可以集中閱讀分析嘅時間可能少過3小時，邊隻紅、追邊隻，先符合人性同實際時間分配。
靠創業成富豪更困難
股市真正問題係有冇下一個概念，即係仲有冇貨賣。其他先進國家市場，例如英股，並冇下一個概念。反觀美股，近近哋8月8日已有Tesla（TSLA）公佈嘅RoboTaxi，表面高科技實際係Cheap精概念，架車車完車主返工，自己去載客賺錢，然後放工車你返屋企，所有曾經揸車返工硬食泊車費嘅車主都幻想過嘅事，依家有機會發生，如果自動駕駛以外有自動清潔功能更佳。
廣告
另一個量子電腦，跳過晶片製程物理上限嘅局限，IBM（IBM）係量子計算領域領軍企業之一；Alphabet（GOOGL）旗下Google舊年發表全新 70 個量子位元 Sycamore 量子電腦運算速度比全球最強美國 Frontier超級電腦快 47 年。
種種跡象顯示，美股一股獨大係常態，股市本身並冇問題。當然，股市以外嘅代價係呢個世代創業而成超級富豪變得更困難，但呢項並非絕大多數股民嘅考慮。
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周六刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com
