如日方中的AI股，侵侵都未有評論過，如果佢話要加強監管或強逼分拆分家，都會令AI股受重擊。 (NurPhoto via Getty Images)
今天是上半年最後一個交易日，唔知大家上半年的投資表現如何呢？
用事後孔明mode睇，只要大家揀啱市場（即係美股），相信上半年應該係贏錢，能夠
搭上一隻半隻AI快車，獲利會十分豐厚，即使你嫌貴唔炒AI股，標普500指數上半年升15%，揀錯股最多只係賺少啲。如繼續留戀港股，恒指上半年升4%，勉強應該可以和和果果，如獨具慧眼買了中特估，絕對可以大幅跑贏大市，如果揀錯市場揀錯股，覺得估值便宜而市場會重新估值，表現應會差一截，繼續癡癡地等。
美國總統選舉成關鍵
下半年美股能否再闖高峰，要留意兩大風險。本文見報之時（周五上午），正是美國總統選舉的首場辯論，屆時肯定口水花四濺，但由於兩位老人家在四年前玩得太激，聽聞電視台為免別人插咀，另一位候選人在非發言時段會被靜音，講乜都無用，之不過有規有矩不代表辯論平淡，如侵侵再出狂言談及加強對中國制裁，或大加關稅，對投資氣氛都會有打擊，而如日方中的AI股，侵侵都未有評論過，如果佢話要加強監管或強逼分拆分家，都會令AI股受重擊。
第二個風險是市場對AI股的期望，相信短期內上遊AI產品的生意是源源不絕，NVDA等股唔憂做，但就以昨天公佈季績的Micron（MU）來看，收入及盈利勝預期，對來季指引也符預期，但只是沒上調指引便令盤後大跌8%，可見現時市場對AI股的期望很高、包容很低。而7、8月份是美股公佈季績的高峰期，如果唔上調指引就大跌的話，這風險不容忽視。
昨天公佈季績的Micron（MU）來看，收入及盈利勝預期，對來季指引也符預期，但只是沒上調指引便令盤後大跌8%。 (HECTOR RETAMAL via Getty Images)
港股低殘，老實講最大的風險就係唔升囉，跑輸定存已經好大鑊了，而近月超強勁的中特估，或多或少因憧憬港股通免股息稅而來，上周陸家嘴論壇沒公佈，可能就是等七一回歸慶祝時宣佈大禮，但近日內地頻傳捉企業漏稅逃稅，在此時講免稅是否有矛盾呢，萬一下周一願望暫時落空，中特估隨時會迎來一波沽售，持重倉的戰友需留意風險。
如上文所說，美國總統選舉除影響美股，中港股市也難倖免，兩者民望距離愈近，對中國的態度會愈硬，低殘的港股究竟可以挨到幾多棍，睇嚟要靠北水接貨救亡，所以總括來說下半年不明朗因素增多，要密切注視選舉的動向啊。
青冰
本欄逢周五刊出
大茶飯 - 青冰 舊文
本文作轉載及備份之用 來源 source: http://hk.finance.yahoo.com
