黃仁勳訪問台灣，旋風震撼全球。 (I-HWA CHENG via Getty Images)
Nvidia（NVDA）嘅創辦人兼執行長黃仁勳（Jensen Huang，又稱皮褸黃）訪問台灣，旋風震撼全球，一手拉起台灣半導體股股價，由於作風親民兼且任影唔嬲，成為新一代科技明星。台灣今日半導
體人才輩出，皮褸黃即使喺台灣長期，相信仍然係科技人才。純粹假設，如果平行時空，黃仁勳當年被帶到香港，會係點？
美股外幣即時報價 多國新聞任睇
黃仁勳在香港會轉行做醫生
1963年，黃仁勳照舊喺台灣台南出世，冇乜分別。
1972年，父母移居泰國，我哋嘅宇宙，黃仁勳同佢哥哥送去美國讀書；喺平行宇宙，黃仁勳呢個時候送咗去香港，9歲插班，跳級兩年讀小六，因為嚟咗香港，年紀雖然最細但體型差唔多，所以冇俾人欺負，兼且成績優異順利升Band one中學。
中學階段，當時未興興趣班，所以假設放學仲有大量時間發展個人興趣，例如科技等等。不過，由於讀書成績太過優異，老師同校長不斷鼓勵佢大個志願係做律師或者醫生。
香港始終係嗰個香港，讀書叻就做醫生律師，發達就買樓收租。 (RUNSTUDIO via Getty Images)
先做醫生 再搞晶片
始終呢度係香港，老師校長親朋戚友日哦夜哦之下，最終選擇讀醫科，1984年喺香港取得醫學學士學位，畢業後成為醫生。
成為醫生後，平行時空嘅黃仁勳雖然名成利就，生活穩定又高收入，但始終冇忘記嗰團科技嘅火，機緣巧合之下，90年代棄醫從科技，加入摩托羅拉旗下香港半導體公司萬力半導體，1995年共同研發出龍珠晶片，成為當年電子手帳嘅晶片。
雖然留喺香港有人遊說佢用醫生嘅名義推啲細價股股票上市，但係心中團火促使佢最終都係離開香港，去咗美國同合夥人創立Nvidia，繼而同樣係1999年納斯達克掛牌上市，之後嘅平行時空發展趨勢一樣，2024年股價係樣升穿1,200美元。同年，喺香港封咗塵嘅龍珠晶片，因為國策，畀人拎返出嚟加奬，希望行返當年冇行落去嘅路，並且立即追上人哋25年耕耘兼冒險嘅成果……
人才，無論你擺佢邊個平行宇宙，最終都係一個人才。同樣道理，香港始終係嗰個香港，讀書叻就做醫生律師，發達就買樓收租，想做創科唔該去美國台灣嗰啲地方，炒炒賣賣先係香港核心價值。所以香港真係一塊福地。
高明
IG
作者簡介︰賺錢係目標，炒股係手段，專欄記載由手段到目標嘅過程。
本欄逢周六刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com
