古星輝 - 5G擴容打造演唱會經濟 | 乜都5G
盛事接連回歸香港，政府早前公布下半年將會有逾百項盛事舉行，當中包括港人最愛嘅演唱會，多個演唱會排隊上演，樂迷們可以大快朵頤。
香港人睇演唱會，喜愛以電話鏡頭對住舞台，自己於電話螢幕睇表演，將「Fan Cam」視角即時分享，對流動網
絡水準有要求。偏偏以往好多人話場地上網困難，喺呢件事上網絡商好無辜，呢啲演藝場地落成嘅時候，流動通訊尚未普及，場地未必考慮到流動網絡規劃，結果所有訊號要倚賴場外發射站傳送，自然未能滿足現今用戶需要。
近年網絡商透過不同方法改善覆蓋，亦屢向有關方面反映情況。結果2023年《施政報告》提出加強大型公眾活動場地5G網絡容量政策措施，再由通訊事務管理辦公室牽頭落實，終於取得理想進展。有關大型公眾活動場當中，包括大家最常去嘅香港體育館、香港會議展覽中心、亞洲國際博覽館及中環海濱活動空間，呢幾個容納萬人嘅演唱會場地。
有關場地嘅5G擴容工程，一直進行得如火如荼，當中會展同亞博早前已率先完工，表現仲相當理想。至於中環海濱同大家最關心嘅紅館，亦已於上月初加入5G覆蓋，並持續提升網絡容量，陸續增加場地黃金頻譜覆蓋，為觀眾提供無縫及高效嘅通訊服務。計劃內仲有維多利亞公園同埋明年開幕嘅啟德體育園，務求將5G覆蓋至大型演出場地。
會展亞博表現理想
到底加強咗5G覆蓋同容量有何分別？我哋做過一個小統計，喺早前中環海濱演唱會期間，數據上載數量較平日上升接近7倍！於大型表演場地加強5G覆蓋及容量後，除咗觀眾打卡分享更快，亦為主辦單位帶嚟5G直播嘅可能性，將演出帶俾更多觀眾欣賞。
和記電訊香港執行董事及行政總裁
古星輝
乜都5G - 古星輝 舊文
本文作轉載及備份之用 來源 source: http://www.stheadline.com
