認真看待睇跌評論的比例，通常較睇升的為高。 (PonyWang via Getty Images)
幾年前有一名自稱牙醫嘅網民喺社交媒體撰文，基本上所有嘢都睇淡，除咗債券。嗰位牙醫嘅行文用字有趣，其中一篇文章標題「納指要跌八成」，十分好玩，高明忍唔住喺戲仿型式寫咗一篇「芥蘭要跌八成」，
寫完之後行街市從此買菜冇人搭棵蔥畀我。
美股外幣即時報價 多國新聞任睇
股評初心就係要有人睇
股票市場自從1602年荷蘭東印度公司（Vereenigde Oostindische Compagnie, VOC）成立，發行股票給公眾而成第一間上市公司後，股市運作大致上仍未離開過其初心，參與者主要兩個行動「買」，或「賣」，不論咩工具大致上冇變。
股評亦都係一樣，初心就係要有人睇，到今日仍然有人講跌九成，亦無疑係比升九倍嘅講法吸引。例如美國基金名人阿木（Cathie Wood・中文譯名因應其基金表現轉變），給予Tesla（TSLA）2029年目標價2,600美元，較現價高12倍，一般反應係當佢癡人說夢。
相同戲碼，就好比災難片有叫座力，定係一個好爸爸努力工作出人頭地賣座。 (Ig0rZh via Getty Images)
股評與操作兩回事
同樣另一極端，就係叫價跌九成，認真看待睇淡說法嘅比例高好多。相同戲碼，就好比災難片有叫座力，定係一個好爸爸努力工作出人頭地賣座。
另一方面，股評亦有其道德責任，一個「評」字除咗畀嚇comments之外，更重要就係critiques，留言求其上小紅書抖音睇就得，critique唔係咁容易，最近消委會就上市公司產品嘅critique，都一度對市場價格起咗作用。背負一個「評」字，就係預咗力排眾議，又抵受得住旁觀者嘅情緒反彈。
廣告
你自己鍾意隻股，睇好睇淡自己落注；股評則係娛樂事業，兩回事，唔好撈亂，如果你買股好似股評咁大膽，除咗少數0.1%會發達外其他都破咗產；又如果股評好似正常買賣咁，其實冇乜好睇，就算貼埋倉睇多兩嘢都會悶，最有錢嘅股評人畢菲特個倉任睇，佢都唔會日日出嚟講股票。
答返標題嘅問題，納指會否跌九成。當年睇跌九成嘅評論有一定叫座力，有支持者，時為2018年11月，納指6500點水平，今個星期美股股災位係17435點，燈尾都未見到當年嘅低位。
高明
IG
作者簡介︰賺錢係目標，炒股係手段，專欄記載由手段到目標嘅過程。
本欄逢周六刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com
