第一次減息後有數據證明經濟實在太強，所以今年升上四萬三，可能已經係保守預測。 (Raygun via Getty Images)
近期股市高位反覆，身邊好多朋友都開始討論股票，間中一日大跌，實在難免令升幅後期入市嘅股民氣餒。高明係「香港真係一塊福地」倡議人，喺呢啲前景不明朗嘅時候，又
要發揮正能量，可以肯定咁同大家講，今年必上四萬三點，大家毋須擔心。
美股外幣即時報價 多國新聞任睇
四萬三已經係保守預測
至於點解咁肯定會升上四萬三？實在係因為整體大市嘅強勢未變，加上經濟加息時保時強勁，到第一次減息後有數據證明經濟實在太強，所以今年升上四萬三，可能已經係保守預測。
事實上，道指今年升12.38%，最新啱啱升穿42000點水平。相對標普今年升逾21%，感覺上稍為遜色，但係如果用以下分析員統計數字，就知道指嘅強勢。
根據SentimenTrader嘅高級研究分析員Jason Goepfert指出，過去250個交易日內，道指有152次錄得上升，勝率接近61%。同樣情況只係喺2010年4月同2018年5月出現過。
香港資金自由流動，外圍有機遇可以自由調配資金把握。 (urbancow via Getty Images)
減息利好經濟
好多股民經歷其他市場大起大落，漸漸會覺得三五年一遇大牛市好唔可靠，反而低波幅日日賺更坐得舒服。報告亦指出，過去100個星期中，道指有超過60%嘅星期錄得上升；過去60個月內，道指有63%嘅月份錄得上升；過去15年中，道指有80%嘅年份係錄得上升。
另一指標就係最新CPI數字，9月核心CPI按年及按月分別上升3.3%及0.3%，兩者都升幅超過預期。即係一知道減息，美國人又開始消費。成個道指入面除咗蘋果（AAPL）、微軟（MSFT）、亞馬遜（AMZN），其他就係可樂（KO）、寶潔（PG）、麥當勞（MCD）加埋一眾金融股等。都係一堆穩食消費及經濟增長嘅股份。
所以今年道指上43000點係必然發生嘅事，股民實在可以放心。至於點解同香港有關，因為香港資金自由流動，外圍有機遇可以自由調配資金把握，所以香港真係一塊福地。
高明
IG
作者簡介︰賺錢係目標，炒股係手段，專欄記載由手段到目標嘅過程。
本欄逢周六刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com
