恆生指數
國企指數
恒 指波幅指數近20日

VIX指數 近5日

上証綜指
深圳成指
滬深300

文章漏咗/建議:按此通知

2026年11月18日 星期三

選股情報 - 石鏡泉 2026年11月18日

選股情報 - 石鏡泉 2026年11月18日


18/11/2026 11:05
《楠楠自語-莫灝楠》新世界「1供11」:先換時間,再換空間

  《楠楠自語》新世界(00017)呢次供股,比例罕見,1股供11股,供股價0.9元,較停牌前收市價4.87元折讓約81.5%,集資249億元。上周五(13日)停牌,周一(16日)復牌已經大

幅下跌,收市報2.885元,跌約41%。周二(17日)再跌約15%,收市報2.44元,較停牌前跌近一半。用現價計,都仍然有折讓,但市場其實已經提前消化咗好大部分攤薄。

 
  今次唔單止係集資,而係一套資本重整「組合拳」。大股東周大福企業同滙豐擔任聯席牽頭包銷商,星展亦有參與。周企按現有45%左右持股,承諾出112.9億元認購本身配額;如果其他股東唔供、配售又唔得,周企最多再包銷約73.9億元,持股可以去到72.55%,計及持股同包銷,真金白銀最多要出約187億元。呢筆錢唔細,亦顯示大股東呢次係自己包底,唔只係掛名支持。

 
  包銷安排上,周企先包最多約82.14億股,其餘約69.21億股由滙豐同星展負責,按供股價計約62.29億元。早前有外媒指銀行只係「軟包銷」,質疑信心不足。滙豐資本市場和顧問業務董事總經理蘇煜傑喺網上記者會正面回應,大股東同兩間獨立包銷商都會全面包銷。即係話,供股額原則上已經有人包底,不過仍需要獨立股東大會通過、取得清洗豁免,以及全部貸款人簽約,先可以落實。

 
  供股同銀行貸款重組,係綁埋一齊。新世界有820億元銀行貸款,原本2027年至2029年到期,銀行肯將其中738億元延期兩年,但要先成功供股,再用82億元提前還部分本金。綜合早前報道,滙豐、星展都曾參與集團貸款安排,包銷同延長貸款,可以一齊睇。

 
  公告亦寫得好硬,820億元貸款嘅所有貸款人,都要先簽具約束力協議,供股先可以進行,而且呢個條件唔可以豁免。銀行想股東先注資,公司要注資之前又要銀行先簽紙,兩邊互相制衡。所以249億元集資,核心作用之一,係為呢738億元銀行貸款換多兩年時間,避免被迫以較不理想嘅價錢賣資產。

 
  時間換到,但債務壓力未完全拆走。截至今年6月底,新世界總債務仍有1433億元,淨債務1263億元,淨負債比率68.3%。提前還82億元,對整體規模幫助有限;不過供股成功後,資產負債表會好啲。公司預期淨負債比率可降約20個百分點至約48%;將集資計入股本同現金,粗略都係由68.3%降至約48%。若把永續債都計入債務,市場上有分析指仍然超過七成。長遠目標係,2031年底前合約銷售同資產處置合共1500億元至2000億元,總債務再降400億元至500億元,至到約930億元至1030億元,並且預期3年內唔再供股。就算順利,負債都仲偏高,往後要靠賣樓同出售資產慢慢減,過程都應該會幾耐。

 
  公司指,今次集資規模已按現階段業務計劃所需資金規劃,涵蓋債務支付、已計劃資本開支、營運資金,以及部分可帶來現金回報嘅發展機會。集資淨額241億元,大約分三部分:34%(約82億元)提前償還目標銀行貸款10%本金,36%(約87億元)用於優先票據、銀行貸款、利息,以及支付永續債遞延分派,其餘30%(約72億元)用作加快待發展項目投入。永續債持有人之後有望再收到分派,公司亦表示,處理完遞延分派後,可望恢復派息能力。

 
  對小股東嚟講,1月5日獨立股東大會先係關口。通過之後,可以選擇供、唔供,或者賣出供股權。以停牌前4.87元計,理論除權價約1.23元;以昨日收市價2.44元計,理論除權價大約只剩1.03元。一手1000股,除權後理論市值約1028元;對應11000股供股權,理論上約值1412元。供股權要到1月19日先買賣,價格會跟住正股行。依家供股權價值已經收窄,無論供定唔供,都要計清楚攤薄同再注資嘅成本。《元宇證券基金經理(權益類) 莫灝楠》

 
*《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

選股情報 - 石鏡泉 舊文
本文作轉載及備份之用 來源 source: http://www.etnet.com.hk