中環在線：
黃國英開talk寸爆沈大師
事隔兩年，豐盛金融資產管理董事黃國英（Alex）噚晚又喺伊館舉行財經talk show，數數手指，今次已經係佢第五次
做talk show。全晚兩粒鐘，Alex由頭講到尾，不過有一位「嘉賓」就經常出現喺大屏幕喎，佢咪就係股評人「沈大師」沈振盈囉。
沈大師一向係大淡友，舊年港股狂升，Alex就寸沈大師過去估錯恒指成萬點，都可以繼續穿梭各大傳媒，又指佢舊年至今不停搬龍門，以為股市係足球場，連沈大師近日貼錯德國隊上盤都講埋，所以呢，沈大師成晚出現喺大屏幕嘅次數，無十次都有八次。Alex都算有良心，完場前都有鳴謝沈大師，話無大師無咁多話題。
睇好騰訊繼續升
除咗沈大師，Alex都寸埋堪稱「中國女股神」嘅劉央，指劉央冇蒲頭一排，早前忽然高調唱好「股王」騰訊（700）話睇1,000蚊，隨即嚇窒市場，股王都要調整。事實上，股王家陣股價keep住喺400元上落，點都爆唔上，雖知道騰訊係Alex愛股，舊年佢個倉就係主要靠騰訊食糊，難怪佢內心有道氣咁話「騰訊明明係麥明詩，家陣忽然由女神變女股神」。
不過佢依然睇好騰訊，去到畀冧巴環節，佢認為騰訊上市至今可以升幾百倍，點解唔可以繼續升，估計騰訊其他業務，好似廣告、支付、小程序應該輪住有驚喜，「最大瑕疵都係劉央啫」。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.finance.appledaily.com
