【大茶飯】積小勝成大勝（青冰）
剛剛的周末，有賴戰友贈票，陪咗佢去睇一位前輩的talk騷，若然抱著拿冧把的心態去，可能會有點失望，因為只有十幾分鐘走馬看花式的推介，有唔少都係佢長期的核心股，所以唔算有太大驚喜，不過整個騷的可觀性甚高，因為言談之間係有唔少心法的分享，而有些辛酸位，更是非常
有共鳴，但前輩強調的積小勝成大勝，很值得各位老散學習。
跟開青冰的戰友都知，一注獨贏並非青冰杯茶，好似賭聖咁舖舖曬冷，係好high嘅，但在股場球場，都有唔少例子證明，剎那的光輝不代表永恆，就以世界盃為例，每屆都爆出幾個新星，在賽後會強勢加盟各大球會，但表現往往無以為繼，而真正的球王級球員，每季也交出高水平，可能在大賽會偶而啞火，但這些都是令青冰尊敬的。在去年的大牛市，有邊個唔識賺錢？但今年咁難玩，上半年可以力保不失，到年底仲有增長，才是大師傅啊，畀你煲中了一隻倍升股，固然恭喜，但要再進化，首要唔好輸番出去，其次便要繼續複製成功，呢個係仲難的。
不讓勝利沖昏頭腦，或者給一隻衰股打殘，最佳的方法，就是老生常談的分散投資，但散戶成日以倉細為藉口，有十萬就用五萬買一隻股，呢個玩法在順境波時一定冇問題，但到打守勢波要挨價，一個小震倉已經令自己擔驚受怕，股價有5%波動本係平常事，但當你咁集中注碼去買一隻股，潛水後的心理壓力一定極大，到有壞消息，係人都覺得要止蝕時，由於傷亡慘重，一定斬唔落手。
零成本大法大家或許聽過，就係股價累積一定升幅後，將部分持貨獲利，收回當初的成本，即使隻股𠵱家執笠，你都唔使輸錢，當然呢個係奢侈的做法，隻股要升得夠多，三至五成甚至倍升，加上你唔係揸一手，先用得著，例如騰訊(0700)咁，相信唔係太多人可以用到零成本。其實有事買中了好股，太早食糊其實也很難受，青冰早年曾買過金川(2362)，當年未賣殼時叫做澳門投資，升咗七成就食糊，其實已相當和味，但怎想得到，沽出後仲可以升多八倍，可惜當年道行未夠，無計啦，現在再來多一次，一定識點做吧。
Fb個人專頁http://www.fb.com/chingbing888
大茶飯 - 青冰 舊文
來源 source: http://hk.finance.yahoo.com
