中環在線：離巢未忘港鐵周松崗怕接午夜凶鈴 - 李華華
好多人都想知，點解做港鐵(066)CEO好哋哋嘅周松崗，今年忽然轉去港交所(388)出任主席，答案竟然係「午夜凶鈴」。周主席接受總商會嘅《工商月刊》訪問時坦白講，以前港鐵壞車或者有機件故障，都會搞到CEO，變相要佢24小時on call，所以希望唔想再接到「午夜凶鈴」咁話。
封爵險遭英女皇斬頭
雖然周主席咁講，但係唔代表佢諗住hea做㗎，做咗港交所主席冇耐嘅周松崗，腳頭都算唔錯，港交所即時就成功收購倫敦金屬交易所(LME)，周主席亦都好高調咁話，計劃未來要喺內地設立金屬倉庫，又話要推出人民幣產品，似乎想大搞一番噃。
周主席係咪可以創一番豐功偉業，華華唔敢肯定，但佢就自爆喺2000年時爭啲冇命。話說當年佢獲頒授英國爵士勳銜，當日佢去到白金漢宮，有位上將教佢有關授勳嘅禮節，其實相當簡單，只不過係聽到自己個名就上前單膝下跪，英女皇會用劍輕輕掂吓佢膊頭，其間要仰望英女皇，千祈唔好垂低個頭。
身經百戰嘅周松崗可能緊張得滯，到真正儀式時竟然垂低咗個頭，當佢醒起要仰望英女皇，就即時抬高個頭，點知剛啱英女皇把劍揮到佢頭頂，好在英女皇經驗豐富，先至刀下留人，否則周主席會成為第一個受封時被斬頭嘅爵士㗎。
李華華
mailto:LiWaWa@AppleDaily.com
上一則: 發改委嚴控蔬菜價格
下一則: 中環在線：交行新招搵Lam仔借錢 - 李華華
中環在線 - 李華華 舊文
