金手指：明燈熊證的下場 - 孫柏文
有唔少《金手指》Fan屎都知孫柏文同有線梁心欣喺《爽報》有個倉。由於我係個九流交易員，所以就算心欣為個倉頻頻獲利，個倉都因我跌咗三成。
其中一隻原本賺七個Percent，不過我話唔放，搞到家坐艇嘅拋空滙控(005)Trade，主角噚日就出業績，盈利屬預期下限，因為賣家當有得賺。不過賣搵食工具，一筆過攞番後，第時點？
睇唔通滙控盤數
仲有，我呢幾年成日笑啲人話銀行成本最高係人工，根本就唔係，最高成本係壞賬。首先，啲滙控級嘅銀行，資產一路都唔知點，不過，經過呢幾年都慣咗。家洗黑錢、Libor等烏雲密集，究竟會唔會被罰款？有冇客戶被溫馨提示走？究竟負債或對流動資金嘅壓力係點？
成張資產負債表，兩邊都睇唔透，仲揸？以前都可以話：「未來賺凸就得啦！」不過，全世界經濟都縮細緊，點樣減息，啲人借錢嘅慾望都唔大。
唯一想借嘅，就係嗰啲心裏唔諗住還錢嘅人，銀行又要防佢哋。所以最慘都係啲銀行Sale屎，辛辛苦苦搵個客返嚟，銀行風險部要多多文件。問完個客攞文件，又可能搵啲藉口唔批。最慘就係就算批到，利息又唔會特別平，死未？
最後，我知好多人關心我啱啱喺歐央行行長出口術前入嘅熊證。有Fan屎來電郵問：「阿明燈，你仲唔驚到『標』尿？」 亦有唔少朋友日日問候吓，問我「啲熊證死得未？因為我都想買熊，不過你嗰啲未死，我唔敢入。」真係令我好感動，係孫柏文嘅真正朋友，先至會知要等我啲熊證仙遊後，先可以開始沽。
不過，好似五年前，2007嘅滙控中期業績發佈日，我叫人一注獨沽滙控一樣，當日被人打屁股，我照企硬，今日一樣係咁硬！
孫柏文
作者為獨立股評人
本欄逢周二、四刊出
上一則: 青心直說：金融業明年今日 - 胡孟青
下一則: 投資的天空：好股疲弱衰股走強 - 張士佳
~TITLE_S~金手指 - 孫柏文 2012年7月31日 舊文
