中環在線：雙失波得閒湊女開學 - 李華華
四年前立會選舉，陳茂波帶埋老婆仔女助選，今年唔使選，但又未有新工返，咪有時間囉！
CY重組政府架構嘅議案喺立法會打尖失敗，「五屍實死局」趕唔切7.1「浮現」，盛傳係新設財政司副司長嘅立法會會計界議員陳茂波好快變成「雙失」，今個月中立法會休會後，佢再唔係議員，又未係副司長，真係好得閒。
赴美修讀文科
得閒有得閒好，聽講陳生打算8月中陪阿女Joyce去美國等開學。陳茂波好錫一對仔女，大仔James舊年喺英國讀完大學回港，家喺一間律師樓邊考牌邊學嘢，細女今年9月去美國讀大學，修讀文科，陳生係廿四孝阿爸，加上「雙失」，去美國行番轉都好嘅。
如果陳生真係8月去美國，最開心嘅，應該係打算9月參選立法會會計界議員嘅梁繼昌，事關陳茂波一早搵定接班人林智遠去選立法會，好似佢一出聲，班選民就一定會投票畀林智遠咁，陳茂波行開陣，林智遠少咗個主力幫佢助選，梁繼昌梗開心啦。
上一則: 鐵道部再發債籌180億
下一則: 中環在線：陳裕光做足200分 - 李華華
中環在線 - 李華華 舊文
