中環在線：太古太子爺做勤力高富帥 - 李華華
太古地產(1972)今年1月以介紹形式上市無集資，大股東施懷雅(Swire)家族等咗半年，前晚終於沽舊股套現50億，大家都喺度估佢哋攞舊錢嚟做乜，會唔會用嚟增持番太古A(019)，還是有其他心頭好要買呢?
似見習生調來調去
講番施懷雅家族，佢哋出名低調，太古、太地、國泰航空(293)、港機工程(044)都交由外人管理，好少出面見人，但原來Adrian Swire兩位公子好積極參與集團業務，好似見習生咁，喺集團內各公司調來調去返工，隔幾年調一調，熟識唔同行業嘅運作。
好似年約30歲嘅Sam Swire(施維新)，佢09年開始做國泰及港龍中國區總經理，聽聞遲啲調去斯里蘭卡，睇住家族私人嘅種茶種花生意，呢間公司叫James Finlay，睇資料話係全球最大公平貿易茶葉同咖啡供應商，喺內地昆明都有個花場專種康乃馨。
阿Sam嘅大佬Merlin Bingham Swire(施銘倫)今年39歲，4、5年前喺港機旗下廈門太古工程做行政總裁，家陣就喺母公司英國太古管數。佢係4間上市公司嘅非執董，股東會一定見到佢，但佢通常坐邊皮位，又好快閃，所以無乜人留意到。相對本地富豪家族，Swire真係超低調，兩位太子爺勤力又高大靚仔，係正宗「高富帥」，而且仲未結婚，但係有無幾打女朋友就唔知嘞!
李華華
mailto:LiWaWa@AppleDaily.com
上一則: 態度大變加電費唔再「撐到行」
下一則: 中環在線：銀行請高層金管局要睇過 - 李華華
中環在線 - 李華華 舊文
