金融High Tea——被發財
2012年9月6日
■阿信屋四圍搶舖開舖，高速發展，開始露出變形金剛本色。
美國8月製造業指數遠差預期，內地經濟數據疲弱，空軍又再出動發惡，拖累港股曾瀉300點，失守19150，由於傳出國家副主席習近平無按原訂安排接見外賓，市況虛弱之餘，國企指數仲創11個月新低收市。
大市近日積弱，皆因中資金融股乏力，大行近日多數唱淡內銀股，摩根大通削民生銀行(1988)目標價22%，同時降評級至「中性」，民行股價應聲下跌，收5.78元，挫3.67%。其他內銀股亦偏軟，工行(1398)跌得深一啲，低收0.09元，跌幅超過2%。
阿爺發緊功
在中資股乏力下，恒生指數低開，A股早段再創43個月新低，午後更曾瀉313點，尾市跌幅先略見收窄。恒指收報19145，跌284點，國企指數收報9020，跌175，成交金額由昨日344億元增加至512億元。即月期指收報19067，低水78點，成交6.25萬張。藍籌股利豐(494)連跌四日，收報11.62元，再跌2.5%，走勢唔多靚仔，近排有幾隻長跌股，最嚇人係中信泰富，累跌已經九日，低位撈貨而家都輸到阿媽唔認得，好似利豐呢類高PE股，一樣好難估邊處先係底，貪平走短線就要識止蝕。
內地經濟告急，管理層都開始緊張，加強發功，發改委早前罕見咁一日發咗25條關於城鄉軌道交通建設的批文，涉及大批項目，有關部門估計，未來十年總投入接近2.31億人民幣，對交通建設相關股份好似南車應該係好消息。
大市無景，個別就趁住悶悶地發圍，突然之間玩吓爆上，好似隻有線單日爆上一成幾，爆前上車爆後落車已經好和味，但炒呢類股份仍高危動作，走得慢啲隨時輸死。
最近有人唱好經營阿信屋的CEC(759)，認為佢搞呢瓣業務有可為，好快可以超過傳統的製造業務。中環茶友話，阿信屋開業時，以弱者姿態企出嚟，話畀大供應商打壓，贏盡同情兼建立賣平貨形象，但明眼人一睇佢有上市公司背景，又點會係弱者呢？由此可見幕後老闆係有腦之人啦。
省靚招牌利吸水
阿信屋做完一輪弱者後，最近開始露出變形金剛本色，喺日本車變成火力強勁的機械人，四圍搶舖開舖，高速發展，睇落好似大有可為。茶友口痕痕話，香港賣零食，以前就幾好做，但近年舖租係咁搶貴，人工係咁升，而家仲有無咁好做呢？睇番而家賣零售的連鎖店，好多係幾年前簽落租約，有啲係自己買舖，博生意打和個舖升值賺錢，如果全部舖都係租番嚟，條數真係唔易「圍」。
茶友話，係租金貴、人工貴下做零售，賺錢方法通常有兩個，一係省靚招牌，吸引小本創業者做加盟商，自己收專利費兼供貨，咁就封咗蝕本門；另一個方法就係學周星馳喺《食神》度講，「一間變十間、十間變一百間，然後上市集資發財」，如果要用呢兩條發達橋，首要就係做到場面靚靚仔仔，咁先可以吸引到投資者。
阿信屋高速發展，據講係靠喺日本等地直接引入新品牌，咁樣另闢蹊徑得唔得？茶友唔係行內人，唔敢俾答案，不過，炒賣呢類「發財股」，最緊要係知道自己做緊乜，唔好諗住人買我買，憨居居上咗車唔識落車，最後變成「被發財」囉。
陸羽仁
上一頁 下一頁
金融High Tea 舊文
