金融High Tea——好友太擠踢落車
2012年11月9日
全球上一日好興奮咁炒咗奧巴馬當選半日，到美國市就出事，美股大跌312點。港股跌得好陰濕，恒指低開313點後跌幅收窄至227點，正當大家以為反彈有期，但恒指在兩點半開始跌勢急轉直下，大跌533點至21567點，跌幅2.4%，遠比內地跌1.6%高，大市成交增加至728億元，內地開十八大都幫唔到香港止到咳。
愈係權重股跌得愈多，匯控(005)和中移動(941)都跌2.7%，跌幅多過大市，佢兩隻加二大內銀，再加兩大石油股，已跌287點，佔恒指一半跌幅以上，可見集中隊呢幾隻嘢都可以隊低港股。
專門去跌權重股
中環茶友話，昨日個市壞在太多人睇好，朝早人人都覺得個市跌唔落去，見到美股杜指跌312點，唔係驚到跳車，而係搵位上車，昨日上午無乜股有恐慌性拋售，可見散戶信心好強，早上十點幾一度彈到21871點，即係只跌227點，直情當無件事。
茶友話，情況好似大戶揸住架車，個個老散都睇好逼上車，搞到架車逼逼挾挾，好唔舒服，所以大戶就出手，打幾個轉，轉到你頭暈，實行將你班跟風老散踢落車。如果呢個理論成立，小心個市未調整完，因為跌完未主要睇老散落車未，一日未嚇到你班友落哂車，一日架車仲係震到你頭暈，所以跌完未同散戶驚唔驚有直接相關。
你可能會問點解我仲係話個市會調整，而唔係話個市轉勢向下？首先美股在持續QE放水的情況下，暴跌的可能性不大。其次內地經濟在第三季見咗底，正在轉勢中，內地經濟以至企業盈利都有可能在第四季回升，在呢種狀況下，正吸引資金入場，好難大插。大市再探底，跌近21000點應有支持。
跌市之中，我喜歡睇吓乜嘢股份有得升，大市昨日有約180隻股票逆市造好，鐵路股表現硬淨。中國中鐵(390)逆市升2.2%至4.26元，中國南車(1766)及中鐵建(1186)都微升，只有南車時代電氣(3898)被花旗降評級至「沽售」才下跌1.5%。鐵路相關股咁硬淨主要原因係有報道話，明年鐵路基建投資和投產里程均可能超過今年水平，投資額或超過5,160億元人民幣。消息指相關行業近期非常缺水，明年有望落實四大籌資管道，包括擴大鐵路建設基金基金徵收範圍、保持發行1,500億元的鐵路建設債券、加大財政及銀行信貸支持力度等方面。而家係咁，內地邊一行有消息話阿爺支持，立即可以炒起。
中海外超前達標
內房巨企中國海外(688)公佈10月銷售數字，10月實現房地產銷售額87.8億港元，實現銷售面積60.2萬平方米，分別按年增長29.8%及7.8%。若以首10個月計，中海外累計實現房地產銷售額1,006.8億元，按年增長29%，提前完成今年新修訂的銷售目標1,000億元，累計實現銷售面積647.0萬平方米，按年增長30.8%。
中海外提前在10月達標，仲有兩個月估計都會放慢少少手腳，在咁差市道亦比去年賣多近三成，所以值11.4倍咁高市盈率，但現價已反映高銷售。話番轉頭，恒大(3333)雖然今年最後只追和去年條賣樓數(800億人仔)，無中海外咁勁，但恒大現價只得4倍市盈率，勝在股價平，仲有得追落後。
陸羽仁
上一頁 下一頁
金融High Tea 舊文
