金融High Tea——飛機唔夠鐵路玩
2012年12月13日
■今年9月至11月鐵路基建投資連續保持高位。新華社
港股再炒放水上新高。市場預測美國聯儲局周四有機會宣佈QE3.5版，加速熱錢湧港。金管局昨日又再度入市，向市場注資46.5億元，水源不絕，為港股再添動力。
恒指以全日最高位收市，升179點至22503點，創全年高位。瑞銀昨日更發表行發表堪稱投資界「最牛預測」，最樂觀估計恒指更可升達27000點，即係仲有21%升幅。我就無瑞銀咁牛啦，升到25000點先講啦，呢啲位係2010年11月的頂位，都好大阻力㗎。
鐵路股回氣可再去
近期最牛升幅行業榜，鐵路股可以講係其中之一。阿爺要利用投資帶動經濟，鐵路成為一個大量投資的行業，動車意外後衰咗一排，到今年第三季再開車，9月至11月鐵路基建投資連續保持高位。鐵道部完成固定資產投資5070億元，比去年同期增長了3.1%。單計11月份，固定投資818億元，增幅更加驚人，比去年大增143%，投資咁大，鐵路設備股首先受惠。
鐵路運輸股經營情況唔錯，客運方面，12月至昨日為止，全國鐵路累計發送旅客超過4675萬人次，較去年增加11.3%。貨運亦有回升跡象。鐵路建設需求有增無減。
投資又得，生意又OK，內地鐵路相關股火熱復甦。設備股、建造股食到應，中國中鐵(390)及中國南車(1766)由9月初起動，到昨日收市分別抽高62%及43%，中鐵建(1186)及中交建(1800)分別大升52%及24%，升幅咪話唔驚人。幾隻強勢股昨日輕微回調唞唞氣，升幅相對較細的中交建則繼續追落後，昨日再升2.4%，收7.4元。
老總愛高鐵準時
鐵道部今年的資產投資計劃6300億元，要完成全年任務，12月要達到1230億元。預計鐵路相關股回氣後仍有一浸炒作。大和首次將中國南車評級為「買進」，目標價8.21元(昨收6.82元)。不過，有分析指市場缺水，鐵道部要完成全年投資任務有一定難度。
最後去上海開會，遇上企業高層來自五湖四海，發現好多坐高鐵而來，好多國企老總都話，坐高鐵唔止價錢便宜啲，而且時間好預，飛機常常誤點，明快實慢。北京至上海高鐵去年開通，北京坐高鐵去上海，候車時間30分鐘，選300公里動車行車時間4小時48分鐘。坐飛機候機時間1.5小時，飛行時間2小時，表面睇好似飛機快1個多小時，但內地飛機經常誤點，遲1小時算準時，所以高鐵唔慢好多。
以票價計，330公里高鐵二等位555元人仔(一等位935元)，飛機經濟位全價機票加附加費1320元，差好遠。好多老總話寧坐高鐵，錢銀事少，最緊要係高鐵不會誤點，一到車站有車走，唔使等，啱晒佢地啲心急人。
仲有，北京至廣州高速鐵路將在本月20日開通，這將是內地最長的高鐵，全長2300公里，北京至廣州將從目前的二十餘小時縮短為約8小時，最便宜的票價約1000元人民幣，又搶一批飛機客。
你睇中鐵、中鐵建、南車幾隻鐵路設備股，走勢好勁，而國航(753)、東航(670)、南航(1055)，近排都升番，但完全沒法和鐵路股比，有好多國際航線的國航強啲，以內地為主的東航、南航相當一般，唔係話佢哋唔會升，但小心佢哋被高鐵搶客，由高增長變低增長，咁樣就宜短炒不宜長揸也。
陸羽仁
上一頁 下一頁
金融High Tea 舊文
