金融High Tea——盲摸摸 大大鑊
2012年12月19日
美國「財政懸崖」談判有轉機，杜指跳升超過100點，港股早段跟住走高，最多升74點，午後內地股市反覆回落，拖住恒指往下走，A股收市扳回失地，尾市才回穩，收市微跌18點。國企靠穩，微升8點，造11302點，大市全日總成交1182億，扣除AIG盡沽友邦(1299)的565億元，交投與上日差唔多，有617億元。
政府辣低地產股
昨日拖住大市後腿的是地產股。內地昨日公佈70個大中城市11月樓價走勢。與上月相比，價格下降的城市有10個，上漲的城市有53個。而上月只有25個。不過樓價漲幅溫和，平均升幅大約1%。
內地國土部昨日開記招強調堅持房地產調控政策，會進一步加大分類指導力度。而本地樓市面對情況前景亦差唔多，恒隆集團(010)主席陳啟宗就話，政府「雙辣招」需時實踐，唔可能一吓子扭轉熾熱樓價。陳啟宗認為新招沒有成效，政府仍有很多「藥」可加，中港兩地地產股齊齊走軟。
內地股市蠢動，中國又話城鎮化，散戶好自然想到內需股有運行，好自然咁諗到家電股得，好自然咁諗到內地家電股國美(493)，佢最近一個星期，由0.8元的牛皮位升上0.93元，都升咗十幾個巴仙，但我想講講，佢炒開可能再升，但大家諗嘢唔好咁簡單。
年中開始內地網購商京東商場已大打減價戰，聲言比內地電器銷售商一哥蘇寧和國美的門市價格平10%，國美高調還擊，本來已白熱化的電器商價格戰進一步白熱化。
家電割喉 國美難搞
蘇寧和國美這些以門店為主的電器商，遇上京東商城和淘寶天貓大軍進襲，環境惡劣，在上月的「雙11光棍節」，出現一場網上購物盛宴，淘寶天貓的銷售額高達191億元，同比增加260%，網上銷售以低價策略打開市場，蘇寧和國美拖着一大片零售店的成本，很難招架。更可怕的是京東商城已取得新一輪4億美元的融資，傳聞投資方包括安大略教師退休基金和老虎基金，以發新股比例推算，京東商城估值72.5億美元(561億港元)，竟然和電器銷售一哥蘇寧的市值478億元人民幣(593億港元)十分接近，國美的167億港元市值，相比之下只是小朋友。京東要燒錢，國美陪打都好易輸死。
不過股價好多時在短期內同基本因素唔太相關，國美今年3月高位2.44元，而家得番0.93元，大家唔好唔記得，國美半年由盈轉虧，中期蝕咗5億人民幣，股價在8月跌落0.56元的低位，而家升上0.93元，唔覺唔覺已經反彈咗66%，乜佢基本因素有改善咩？國美面對緊的叫做「範式轉移」，簡單講即係市場大變，對手以網購打店面銷售，京東攞住4億美金來燒，玩割喉競爭，估計佢賣一件電器毛虧損6%，以咁手法打開市場，連蘇寧呢個一哥都一身蟻，何況國美？國美唔係唔會升，可以炒炒內需概念或者炒吓中國股市反彈，短炒無所謂，但若果你以為城鎮化益到國美轉虧為盈，盲摸摸諗住長線投資，隨時大大鑊，小心。
陸羽仁
上一頁 下一頁
金融High Tea 舊文
