金融High Tea——鬥地主
2013年2月28日
■聯儲局主席伯南克大派定心丸，重申量化寬鬆仲有排玩。杜指即鹹魚翻生升116點。新華社
■財爺份《預算案》對樓房著墨不多，內容溫和，估計對樓市不會帶來明顯衝擊。
意大利大選，三個黨派得票率叮噹馬頭。現在的情況係各黨能否合組聯合政府，否則將要重選，歐洲局勢充滿變數，投資者對歐洲危機憂慮重燃，歐股重創。美股全賴聯儲局主席伯南克大派定心丸，重申量化寬鬆(QE)仲有排玩。美股鹹魚翻生，杜指升116點，帶挈恒指高開136點，之後隨內地A股回落，倒跌74點。A股臨收市反彈，恒指又回復升勢，收市升57點至22577點。成交681億元。
財爺鬍鬚曾宣佈《預算案》，內容話平實又得、平淡又得，總之也無風雨也無晴。投資者對派糖大粒啲、細粒啲無乜所謂，最重要係經濟搞得好唔好，對前景有無好處，港人最關心的還是房屋政策。
地產股借《預算案》反彈
財爺表示，在未來五年內將興建7.9萬個公屋單位，由2016至17年起四年內，提供約1.7萬個新居屋單位。一手私人住宅預計在未來三至四年，可以發展6.7萬個單位，係07年以來新高。2013年的私人住宅供應，預計全年可供出售的一手單位數目有2.4萬個，當中包括1.2萬個預售樓花。有分析指住房供應始終遠水不能救近火，仍然難以滿足短時間的房屋需求。
《預算案》對樓房着墨不多，內容溫和，估計對樓市不會帶來明顯衝擊。地產股普遍反彈，成為推動大市上升的主要力量，新地(016)漲近1.5%。信置(083)公佈中期業績，純利36.3億元，連聯營公司物業銷售總收入都勁增1.6倍至102.33億元，股價漲2.9%至13.64元。
由於在《預算案》公佈前，政府搶先公佈打擊樓市方案，《預算案》再無打壓招數，加上今年底土地供應未見大量增加，被視為「利好消息」，被辣招辣到暈的地產股，於是借勢反彈，撞啱公佈靚仔業績的新世界(017)，成為表現最好的藍籌之一。
預算案喺土地供應方面無重招，被理解為未來供應仲係好難大幅增加。中環茶友話，?家政府係巧婦難為無米炊，振英哥未做特首前，以為加地好容易，點知上任後左搞又唔得、右搞又唔得，連攞塊市區地仔起豪宅，都被大學校長「死諫」，仲有政府本來想增加公屋供應，點知原來連地都未搵齊，加上要復建居屋，變成公私營樓宇爭地，喺未有大型開發項目前，《預算案》自然難以大增土地供應啦。
不斷出招捱到加息
有人奇怪點解政府恢復公開賣地，認為如果個個月有地賣，公眾就會感覺到增加緊供應啦，不過，公開賣地乃係雙刃劍，因為如果土地供應唔多，地產商競出高價去搶，咁豈不是有反效果？故此在真正建立足夠土地儲備時，用乜形式賣地，都只係包裝技巧，好易一戳就爆煲。
茶友話，?家無論美國抑或中國，最近加上日本，都猛印銀紙，三大經濟體的印鈔機開動，是全球物業漲價的真正推手，為了應付呢股狂潮，各國政府領導人，無論自願或被迫都好，都要加入「鬥地主」遊戲，故此無論中國、新加坡、香港都一樣，不斷出招打壓樓市，希望捱時間等到美國真係加息，到時就鬥死鬥殘地主。不過，地主經過呢幾年吸足養份，無論中港星財團，個個都大大隻隻，手瓜起𦟌，唔容易一吓打殘，喺呢個過程中，無論樓價同地產股都係炒來炒去、彈上彈落，好似昨日咁冇壞消息見光，反彈就一啲都唔奇啦！
陸羽仁
上一頁 下一頁
金融High Tea 舊文
